Kas nayon a pangrambak ti AMMA Foundation Literary Awards iti Maika-25 nga Anibersariona itoy a tawen, inkeddeng dagiti mangimaton iti salip a manayonan ti bilang dagiti mangabak iti maika-23 nga edision ti salip iti sarita ti AMMAFLA a naggibus idi Mayo 31, 2021.

Sangapulo ket lima dagiti naisalip a sarita a naipaima kadagiti kameng ti Hunta Dagiti Hurado:

Maikalima a Pangta: Pito a Simulacra; Maysa a Malem Idiay Stanley Park; Silo; Tudo iti Kalgaw; Gameng;

Dayyeng ti Kaunggan; Sangapirgis a Gasat; First Prize; Starlight, Starbright; Bua;

Dara iti Sumingising nga Init; Orate Pro Nobis; Idi Dakami; Ti Arapaap ni Rodel; ken Kallawit ni Gasat

Nairanta ti pasalip ti AMMAFLA kadagiti agdadamo a mannurat iti sarita iti Ilokano a “kas pangaron iti reggetda a mangpatadem pay iti plumada.”

Dagiti gunggona: Umuna, P10,000.00; Maikadua, P8,500.00; ken Maikatlo, P7,000.00.

Mainayon ti Maikapat, P5,000.00; ken Maikalima, P3,000.00.

Mayayon met laeng daytoy iti maysa kadagiti probision ti salip nga agkuna: "Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan."

Maammuan iti mabiit no asino dagiti nangabak a mannurat.

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton ken kangrunaan nga isponsor ti AMMAFLA a da Amado ken Gloria Yoro, ken Francisco ken Aurora Ponce (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) a nagpaayan da Cles B. Rambaud ken Juan Al. Asuncion nga editor iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.