Ni CHARISSA LUCI-ATIENZA
Kalikaguman ti Department of Education (DepEd) a masigurado a nakasagana amin nga agad-adal a Filipino para iti umay nga School (SY) Year 2021-2022.
Gapu iti daytoy, rinugianen daytoy nga ipabuya dagiti episode ti ETULay Summer Camp, maysa a libre nga online tutorial platform a mangididiaya kadagiti remediation programs iti English ken Math para kadagiti interesado nga agad-adal.
Mangididiaya pay ti ETUlay iti Scouting, Arts and Craft Class, Music Class/Playing of Musical Instrument, Theater Play-acting workshop, ken dadduma pay a segment para iti umay a panaglulukat ti klase.
Maisaysayangkat ti programa manipud pay idi Hulio 19 ken aggibus daytoy iti Agosto 28.
TURISMO: Intayon Idiay Ayuyang Garden iti Pila, Siudad ti Laoag!
Kuna ti DepEd a nadumaduma a mannursuro manipud iti nadumaduma a dibision dagiti pagadalan iti entero a pagilian ken iti Central Office ti birtual a mangiwardas kadagiti agsasabali a topiko iti tunggal Lunes agingga iti Biernes manipud iti alas nuebe iti bigat agingga iti tengnga ti aldaw.
Segun ken ni Education Secretary Leonor Magtolis Briones iti maysa a pakaammo ita a Lunes, Agosto 2, nga uray iti tiempo ti bakasion, magutigot dagiti agad-adal a makipaset kadagiti nadakamat nga aktibidad tapno manayonan pay ti nagun-odda nga ammo iti napalabas a panagbabasa.
Innayon pay daytoy a siguraduenda a dagiti agad-adal, nakasagana a mangsaranget kadagiti adalen dagitoy iti sumaruno a tawen, nangruna ta maipakpakat pay laeng ti distance learning modality.
Aw-awisen ti DepEd dagiti agad-adal a maalada dagiti session kadagiti kangrunaan a social media page kensabsabali nga account daytoy iti DepEd Tayo Regional Facebook.
Nayalnag ti ETULay iti nasapa a paset ti tawen tapno maipaayan dagiti agad-adal ken mannursuro iti maysa nga online tutorial platform.
Nadisenio pay ti ETULay maibatay iti linawas a Most Essential Learning Competencies (MELCs) tapno maipaay kadagiti nagannak ken agad-adal ti nalaklaka a wagas a panangsungbatda kadagiti Self-Learning Modules a nasukog manipud iti PIVOT 4A QuBE a programa ti Region IV-A.
Kuna ni Undersecretary for Administration Alain Del B. Pascua a maysa ti ETULay kadagiti naidumduma a wagas mamagbalin a kabaruanan ti sistema ti edukasion.
Innayon daytoy a masapul a mapabaro ti pannakaidanon ti edukasion babaen ti panangusar a nasayaat iti teknolohia. Maysa ti ETULay kadagiti adu nga addang ti DepEd tapno masigurado a maisayangkat daytoy a panagbalbaliw para iti pagimbagan dagiti agad-adal.
(Damag manipud iti Manila Bulletin.)
