Inatiw ni Carlo Paalam ti defending champion a ni Shakhabidin Zoirov ti Uzbekistan tapno makastrek iti semifinals iti flyweight division ti boksing iti 2020 Tokyo Olympics itoy a Martes, Agosto 3.

Nangabak ni Paalam babaen ti split decision ta umun-una iti karta dagiti hurado kalpasan a nagdara dagiti boksingero iti panagtinnim-ogda, rason tapno pasardengen ti reperi ti laban iti 1:40 a nabatbati nga oras iti maikadua a rikus.

Iti daytoy a panangabak ni Paalam, sigurado nga addan bronse a medalia daytoy, ken maikapat a medalia para iti Filipinas iti kaunaan a gundaway iti tay-ak ti Olympics.