Ni ANALOU DE VERA
Addan ti Delta variant ti coronavirus iti siam iti 17 a rehion ti pagilian.
Daytoy ti kinuna ni Dr. Alethea De Guzman, Epidemiology Bureau Director ti Department of Health (DOH) itoy a Mierkoles, Agosto 4, 2021.
Dagiti region: Ilocos (lima a kaso), Central Visayas (32), Northern Mindanao (14), National Capital Region (46), Central Luzon (20), Western Visayas (5), Calabarzon (28), Eastern Visayas (10), ken Davao (4).
Nakatakuaten ti Filipinas iti 216 a kaso ti Delta variant a 48 kadagitoy, mainaig kadagiti nagawid a Filipino manipud iti ballasiw-taaw, idinto a dagiti nabatbati pay, maibilang a kaso a mismo ditoy Filipinas.
Manipud Kadagiti Agdama a Kameng ti Bannawag: Dios ti Agngina!
Segun ken ni De Guzman, kasayaatan nga ibilang nga addan community transmission ti Delta variant iti laksid ti kaawan ti ebidensia.
Kuna daytoy nga agur-urnong pay laeng ti Departamento iti nalawag nga ebidensia tapno maibaga nga addan community transmission. Isuna laeng ta saanen a mayuray pay daytoy. Ngarud, agtrabtrabaho ti Departamento babaen ti panangipapan a dagiti kaso a naireport, adda man wenno awanan iti sibubukel a genome sequencing, maibilangen dagitoy a kaso ti Delta variant, kas kuna ni De Guzman.
Innayon pay daytoy nga amin a pagilasinan, paspasingkedanda nga umad-adu ti kaso. Nakasagana ngarud ti Departamento a mangsarangeten iti daytoy, a masapul ti estratehiko a panagtignay tapno mapengdan ti negatibo a maaramidan ti Delta.
Kuna ketdi ni De Guzman a nagtalinaed ti pagilian iti klasipikasion a moderate wenno kalalainganna ti risgo ti COVID-19. Kayatna a sawen, ti panagadu ti kaso iti kada dua a lawas ket 31 porsiento idinto a ti average ti pannakaatakar iti inaldaw ket 6.14 iti kada 100,000 a bilang ti populasion.
Ti adatna, kuna ni De Guzman nga addan dagiti rehion ti Ilocos, Cagayan Valley, Central Visayas, Northern Mindanao, Cordillera Administrative Region (CAR), ken NCR iti klasipikasion a nangato a risgo (high risk case classification) iti COVID-19.
Iti NCR, ti average a bilang ti kaso iti inaldaw ket 1,596. Kayatna a sawen, nangatngato iti 629 wenno 65 a porsiento ngem iti kaudian a report a mapan laeng a 967 a kaso iti inaldaw. Pammaneknek daytoy nga immadu dagiti kaso iti arinunos ti Hulio ket agtultuloy ti yaaduna kadagiti napalabas nga aldaw.
Maisaad ti Metro Manila iti enhanced community quarantine (ECQ) iti Agosto 6 agingga iti 20 tapno matungday ti panagadu ti bilang dagiti kaso.
(Damag manipud iti Manila Bulletin.)
