Inyalat ni Roberto B. Palope ti Ar-arosip, Buli, La Paz, Abra ti Umuna a Gunggona ti Salip iti Sarita ti 23rd AMMA Foundation Literary Awards babaen ti saritana a “Silo,” kas impakaammo ti Secretariat ti AMMA Foundation Literary Awards.
Kadua ni R.B. Palope a nangabak da:
Riaflor B. Rebolledo ti Siudad ti Baguio, Maikadua a Gunggona, babaen ti saritana nga “Starlight, Starbright”;
Jefferson M. Somera ti Naguilian, Isabela, Maikatlo, a Gunggona, babaen ti saritana a “Ti Arapaap ni Rodel”;
Sonny A. Vila ti Brgy. 13, Naglicuan, Pasuquin, Ilocos Norte, Maikapat a Gunggona, babaen ti saritana a “Maysa a Malem Idiay Stanley Park”; ken
Leonila C. Aday ti Madarang, Salcedo, Ilocos Sur, Maikalima a Gunggona, babaen ti saritana nga “Idi Dakami.”
Dagiti kameng ti hunta ti hurado: Juan Al. Asuncion, Literary Editor ti Bannawag; Ariel S. Tabag, Poetry & Entertainment Editor ti Bannawag; ken Aileen R. Rambaud, mannurat ti Bannawag ken agpapaay a Prinsipal ti Badio Elementary School iti Pinili, Ilocos Norte.
Dagiti kangrunaan nga isponsor ti salip: Amado I. Yoro ken Francisco T. Ponce, agpada nga agindeg iti Hawaii.
Nagpaay met a Chairman ti Secretariat ni Cles B. Rambaud ti Bannawag.
Naggibus ti salip idi Mayo 31, 2021, nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”
Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a nangabak iti daytoy nga edision ti AMMAFLA.
Malaksid iti premio a kuarta, maipaayan pay dagiti nangabak iti sertipiko ti pammadayaw.
Nagretiro ni R.B. Palope nga empleado ti opisina ti Municipal Planning and Development Coordinator ti ilina a La Paz a kas Draftsman-designate idi 2014. Agsursurat iti Bannawag ken iti Abra Bulletin (ABRAham Journal itan). Kolumnista ken nag-Editor-in Chief iti daytoy a pagiwarnak. Naipasngay idi Agosto 5, 1951 iti Buli, La Paz, Abra kada Balbino Espiritu Palope, Sr. ken Eufemia Baldos Biscarra (agpadada a natayen). Inaunaan iti tallo nga annak a pasig a lallaki. Nagbasa iti La Paz Central School iti elementaria (La Paz Integrated School itan); sekundaria iti La Paz Catholic High School (Queen of Peace High School itan); ken nagturpos iti Bachelor of Science in Industrial Technology, Major in Drafting iti Abra School of Arts and Trade (Abra State Institute of Science and Technology itan). Nayasawa ken ni Emerlinda Balingit Dolor a kapurokanna met laeng. Addaanda iti tallo nga annak a babbai, da Baby Shiela, Everlynne, ken Lovely Rose (agpapadan a naasawaan ken saggaysada iti annak).
Agpapaay met iti agdama ni Ria Rebolledo a volunteer in-house editor iti Pansigedan Advocacy Cooperative iti La Trinidad, Benguet. Naipasngay iti Baguio City, nagturpos iti AB English iti University of Baguio. Agsursurat kadagiti daniw ken sarita a kaaduanna ti naipablaak iti Bannawag ken kadagiti antolohia ti GUMIL Filipinas. Maysa isuna a Fellow iti Pasnaan 7 a naangay iti Urdaneta City, Pangasinan idi 2017.
Agdama met a kameng ti Philippine Army ni J.M. Somera kas Executive Officer ti 86th Infantry Battalion a nakabase iti Jones, Isabela. Maikadua iti tallo nga annak da MSgt. Antonio Somera (Ret) ken dati a Patricia Morales (pimmusayen) ti Naguilian, Isabela. Naileppasna ti kurso a BS in Criminology iti College of Criminology, University of Northern Philippines, Vigan City idi 2003. Maysa kadagiti napadayawan a kas “Top 10 Most Outstanding Graduating Student Leader” iti dayta nga academic year. Sigud a nakadestino iti 1st Infantry Division a nakabase idiay Zamboanga Del Sur a nagpaayanna iti sangapulo a tawen. Kalpasan ti serbisiona iti Mindanao, nayakar iti 5th Infantry Division iti ili ti Gamu, Isabela. Nagpaay a hepe ken pannakangiwat ti 5th Division Public Affairs Office (5DPAO) iti dua a tawen. Tallo ti bungada a pasig a lallaki ken sigud a Leonie Mae Tuscano, da Lean, Thomas ken Marc.
Maysa nga OFW, agtrabtrabaho ni S.A. Vila iti Kingdom of Saudi Arabia. Agnaed ti pamiliana iti pagtaenganda iti Brgy. 171, Bagumbong North Caloocan City. Maikatlo iti lima nga agkakabsat; dua met ti bungada iti kaingungotna.
Mangisursuro met ni L.C. Aday iti Madarang Elementary School iti Brgy. Madarang, Salcedo, Ilocos Sur; iggemna ti Kinder, Grade 1 ken Grade 2 (multi-grade). Naipasngay idi Hulio 4, 1974 iti Siudad ti Baguio (taga-Salcedo, Ilocos Sur ni tatangna; taga-Banaue, Ifugao ni nanangna), agnaed ita ti autor iti Brgy. Madarang, Salcedo, I.S. kaduana ti kaingungotna, ni Aladin (tubo ti Sta. Cruz, I.S.) ken dagiti uppat nga annakda.
Dagiti nagdonar kadagiti premio a kuarta para iti daytoy nga edision ti salip: Umuna a Gunggona: agkaingungot a Fidel ken Priscila Ramirez ken ti pamiliada (para iti pakalaglagipan daydi amada Apo Florencio T. Ramirez), Maika-2 a Gunggona: agkaingungot nga Ernesto ken Estrella Ponce ken ti pamiliada (pakalaglagipan daydi amada Apo Theodore P. Pabo), Maika-3 a Gunggona: agkaingungot a Nomer ken Catheryn DeGuzman ken ti pamiliada (pakalaglagipan daydi amada Apo Crispiniano DeGuzman), Maika-4 a Gunggona: agkaingungot a Francisco ken Aurora Ponce ken ti pamilada (pakalaglagipan daydi amada Apo Cirilo A. Ponce), ken Maika-5 a Gunggona: agkaingungot a Francisco ken Aurora Ponce ken ti pamiliada (pakalaglagipan daydi amada Apo Antonio E. Cacdac, Sr.) (Cles B. Rambaud)
