Ni CARLO ANOLIN
Inyalat ni Carlo Paalam ti maikadua a plata a medalia ti Filipinas iti 2020 Tokyo Olympics kalpasan ti pannakaatiwna ken ni Galal Yafai ti Great Britain iti flyweight finals iti Kokugikan Arena idi kalman, Sabado, Agosto 7, 2021
Iti umuna pay laeng a rikus, iti pannakaipasulina, pinanaltaak ni Yafai ti rupa ni Paalam banag a namaglulok ken nakaipatugawan ni Paalam. Dagus a timmakder daytoy ngem binilangan ti reperi agingga iti walo. Dakkel met daytoy a nagponduan wenno nangitarayan ni Yafai ken ni Paalam.
Agresibo ketdi ni Paalam iti maikadua a rikus babaen dagiti agsasaganad a kombinasion a naipastrekna ken ni Yafai. Ngem nakaipastrek met kadagiti epektibo a bales ti boksingero a Briton nga immanay tapno maallukoyna manen dagiti hurado a pumabor kenkuana.
Iti maikatlo a rikus, sinigurado ni Yafai ti addangna tapno maalana ti balitok a medalia babaen ti ididistansiana. Saan metten a nasustener ni Paalam ti kinaagresibona iti maikadua a rikus. Nupay kasta, pimmabor amin kenkuana amin dagiti hurado. Ngem saanen a nabaelan ti iskorna a binaliwan ti taray ti laban. Inyalat ni Yafai ti balitok a medalia babaen ti pinal nga iskor a 29-28, 28-29, 29-28, 29-28.
Manipud Kadagiti Agdama a Kameng ti Bannawag: Dios ti Agngina!
(Damag manipud iti Manila Bulletin.)
