Ni LIEZLE BASA IÑIGO
SANTA ANA, Cagayan – Natiliw ti uppat a maatap nga illegal loggers ken nasamsam manipud kadakuada ti sumurok-kumurang a 4,000 a board feet a tablon iti checkpoint ti Inter-Agency Task Force (IATF) iti Casambalangan itoy nasao nga ili itay Domingo, Agosto 1.
Innaganan ti polisia dagiti maatap a da Jordan dela Cruz Ramos, 31, ti Calantipay, Baliwag, Bulacan; Ariel Perez Balibalita, 21, ken Robert Timbal Gac-Ang, 23, agpada a residente ti San Rafael, Bulacan; ken Melchior Dignos Lee, 40, ti Barangay Barangca, Baliwag.
Nakaawat dagiti nakadetalye iti checkpoint iti impormasion nga imbiahe ti uppat nga indibidual ti aglalaok a tablon wenno naragadi a troso babaen ti trak ken lumasat iti yan dagitoy.
Nagbanag a husto ti impormasion ta pudno a naglaon ti trak kadagiti illegal a tarikayo. Gapu met iti daytoy, tiniliw ti lokal a polisia, Provincial Intelligence Unit ti polisia ti Cagayan, 4th Mobile Force Platoon ti 2nd Provincial Mobile Force Company, Regional Maritime Unit 2, Department of Environment and Natural Resources-Community Environment and Natural Resources-Aparri, ken Cagayan Economic Zone Authority dagiti uppat a maatap nga illegal loggers a mangibiahe koma kadagiti tablon.
TURISMO: Intayon Idiay Ayuyang Garden iti Pila, Siudad ti Laoag!
Nasamsam pay kadagiti maatap ti Mitsubishi wing van nga addaan iti lisensiado a plaka nga NAP-7477 a nakaikargaan ti 62 a pedaso a tablon iti agduduma a rukod ken natantia nga agdagup dagitoy iti 4,671.73 a board feet ken ginatadan ti DENR iti P255,115.60.
Gapu ta di nakaiparang dagiti natiliw iti dokumento a mangipakita iti kinalegal dagiti tablon, naipan dagitoy iti kustodia ti lokal a polisia idinto a maisagsagana ti kaso a panaglabsing iti Presidential Decree (PD) 705 wenno Revised Forestry Code kontra kadagitoy.
Damag manipud iti Manila Bulletin.)
