Pimmusay ni Apo Gregorio T. Amano, napadayawan a Pedro Bucaneg Awardee idi 1997, itoy nga aldaw, Agosto 10, gapu iti pannakaidalitna iti sakit (pleural effusion--kaadda ti danum iti bara wenno panagdanum ti bara). Ti Pedro Bucaneg Award ti kangatuan a pammadayaw a maipaay ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, kadagiti mannurat nga Ilokano a dakkel ti naitulongda iti pannakasaluad ken pannakaparang-ay ti Literatura Ilokana.

Naipasngay ni Apo Amano iti Vigan idi Nobiembre 17, 1934 kada Esteban Amano ken Olympia Taer. Nagturpos iti Philippine College of Arts and Trades iti Manila. Maysa kadagiti kaunaan a nagisuro iti Ilocos Sur School of Arts and Trades (ISSAT) a nagbalin idi agangay a University of Northern Philippines (UNP). Nagpaay a prinsipal iti trade school ken chief, Teachers Education Department iti Ilocos Norte College of Arts and Trades (Mariano Marcos State University itan iti Laoag City).

Naipaayan iti scholarship iti babaen ti Colombo Plan ken naibaon a nagadal iti Tokyo, Japan.

Nagpaay a propesor ken dekano iti MMMSU.

Nangrugi nga agsurat iti Ilokano idi 1957 idi maipablaak ti daniwna nga “Arado” iti Bannawag.  Adun ti nasurat ken naipablaakna a daniw, sarita, ken salaysay maipapan iti practical arts iti isu met la a magasin. Nairaman ti sumagmamano a gapuananna iti Tugot, antolohia nga inedit da Onofrecia Ibarra ken Hermenegildo Viloria.

Nangab-abak kadagiti salip iti panagsurat iti piksion. Maysa kadagiti sinuratna a sarita ti nangyalat iti Umuna a Gunggona iti Gov. Roque Ablan Awards for Iloco Literature idi 1986. Mabigbig pay a dumadaniw. Idi panawenna, aktibo a kameng iti GUMIL Laoag, GUMIL Ilocos Norte, ken GUMIL Filipinas.

Nagpaay pay nga editor ti Philippine Educational Journal, ken autor ti uppat a libro iti Practical Arts nga ar-aramaten a textbooks dagiti vocational schools iti pagilian.

Inkallaysana ni dati a Teresa P. Benson (pimmusayen), ken addaanda iti siam nga annak ken 45 nga appo ken appoko ti tumeng. (EBC)