Ni LIEZLE BASA IÑIGO
CAGAYAN – In-inut a madlaw ti panagadu ti kaso ti coronavirus (COVID-19) iti probinsia kas paneknekan, kas pagarigan, ti maysa a pasiente nga agur-uray iti pagparkingan ti ospital a nakabitan iti tangke ti oksiheno idinto nga adda iti uneg ti lugan.
Iti karabiyan ti Lunes, Agosto 9, adda 265 a kabarbaro a kompirmado a kaso ken pito ti pimmusay, segun iti rekord ti Cagayan Provincial Information Office.
Iti dagupna, addaan ti probinsia iti 1,976 nga aktibo a kaso.
Kaaduan ti kaso ti Tuguegarao City iti 73 a kaso a nainayon wenno agdagupen iti 635 a kaso iti nasao a siudad ken maibilangen nga epicenter ti bayrus iti Rehion 2.
Manipud Kadagiti Agdama a Kameng ti Bannawag: Dios ti Agngina!
Maikadua a kaaduan iti Cagayan ti ili ti Baggao nga addaan iti 63 a kabarbaro nga aktibo a kaso idinto nga addaan ti Gonzaga iti 44 a kaso.
Kabayatanna, pito ti pimmusay iti nasao nga aldaw manipud iti Tuguegarao City, Sto. Niño, Solana, Pamplona, Lal-lo, Iguig, ken Baggao.
Atapen ketdi ni Gob. Manuel Mamba nga addada pimmusay a saan a nairekord. Segun kenkuana, kadagiti siam a pimmusay, maysa laeng kadagitoy ti adda iti Cagayan Valey Medical Center. Saan pay a kompirmado ngem maatap a dagiti dadduma pay a pimmusay ket posible nga adda dagitoy iti balbalayda a naka-home quarantine.
Kadagupanna, addan 47 a pimmusay iti Cagayan iti uneg ti umuna a siam nga aldaw ti Agosto, idinto a 519 ti dagupna manipud nangrugi ti pandemia iti napan a tawen.
(Damag manipud iti Manila Bulletin.)
