Ni CHARISSA LUCI-ATIENZA
Opisial a pasangbayen ti Department of Science and Technology (DOST) iti daytoy Biernes, Agosto 13, ti pito a Balik Scientists nga agbalin a kangrunaan a paratignay ti mabangon a Virology and Vaccine Institute of the Philippines (VIP) ti pagilian.
Manamnama a kauman dagitoy pito a Filipino a virologists a nagsanay iti ballasiw-taaw ni DOST Secretary Fortunato “Boy” T. de la Peña iti daytoy Biernes tapno ibinglayda dagiti paglainganda iti pannakapasayaat ti lokal a bakuna kontra iti coronavirus disease (COVID-19) ken dagiti sientipiko a sukisok dagitoy iti virology ken dadduma pay a sakit.
Segun ken ni De la Peña, manamnama a dagitoy a Filipino a sientista ti agbalin a paratignay iti pannakabangon ti Virology and Vaccine Institute. Mamati ti Sekretario a makatulong dagiti adu padas ken paglaingan dagiti sientista iti pannakapaaud dagiti sientipiko a panagsukisok ken addang tapno malabanan ti COVID-19 ken dadduma pay a bayrus a mabalin a sumangbay iti masakbayan.
Saan laeng nga adalen ti VIP ti agdama a COVID-19, mangiwayat pay daytoy iti ad-adu pay a sientipiko a panagsukisok maipanggep iti virology ken sakit dagiti tao, ayup, ken mula.
Manipud Kadagiti Agdama a Kameng ti Bannawag: Dios ti Agngina!
Kuna ni DOST Undersecretary for Research and Development (R&D) Dr. Rowena Cristina L Guevara a dagiti pito nga eksperto ti agbalin a puso ti mapabangon a VIP. Papartaken met dagitoy ti yaadu dagiti mangbukel iti sientipiko a komunidad.
Maysa kadagiti pito a Balik Scientists a makiuman ken ni De la Peña ni Dr. Elpidio Cesar Nadala, Jr., a maysa kadagiti nakipagbuangay iti Diagnostics for the Real World, Ltd (DRW) iti California, United States.
Dinakamat ti DOST a virologist ken microbiologist ni Nadala nga addaan iti 20 tawen a padas iti akademiko a sukisok ken 17 tawen iti industria a nangdebelop kadagiti diagnostic assay para iti deteksion dagiti pathogen dagiti bakteria ken bayrus.
Kas nakipagbuangay iti DRW, indauluan ni Nadala ti pannakapatan-ay dagiti rapid diagnostic tests a mangkita iti kaadda ti Hepatitis B Virus (HBV) surface antigen, Human Immunodeficiency Virus (HIV) antibodies, ken Hepatitis C Virus (HCV) antibodies, kasta met ti napasayaat a bersion ti CE-marked Chlamydia rapid test.
Dinakamat pay ti DOST a karaman iti innuman ni Dr. Leodevico L. Ilag nga addaan iti 25 a tawen a padas iti panagsukisok ken preclinical ken clinical a pannakapasayaat dagiti biologics ken makan a maipakat iti oncology, cardiovascular disease, CNS, infectious disease, metabolic disease, ken dermatology. Addaan pay iti padas iti international entrepreneurial biotechnology iti Europa, USA, Asia, ken Australia.
Dagiti dadduma pay a Balik Scientists a mairaman iti pannakabangon ti VIP: Dr. Homer Pantua ti Bio Assets Philippines and Genentech, United States; Dr. Teodoro Fajardo ti UK NEOAS; Dr. Christine Lora Leyson ti Southeast Poultry Research Laboratory (SEPRL), Dr. Myra Hosmillo ti University of Cambridge, ken Dr. Lourdes Nadala ti Diagnostics for Real World, Ltd. (DRW).
(Damag manipud iti Manila Bulletin.)
