Ni ELLSON QUISMORIO
Adda naimbag a damag para kadagiti Filipino nga addaan iti plano nga agtrabaho iti Guam.
Kuna ni Labor Attaché iti Los Angeles, Armi Evangel Peña iti daytoy Biernes, Agosto 13, a nakainanama iti daytoy a dekada ti posibilidad a panagtrabaho iti Guam para kadagiti overseas Filipino workers (OFWs).
Iti maysa a virtual press briefing ti Department of Labor and Employment (DOLE) iti Manila, kuna ni Peña nga iti sumaruno a 10 a tawen, masapul ti nasao a teritorio ti Amerika ti mapan a 11,500 a trabahador wenno ad-adu pay. Mapan a 2 agingga iti 3 ribu ti naberipikaren a job orders. Maipapan iti pannakaipatulod dagitoy, agdepende iti recruitment agency ken iti pannakaaprobar ti visa dagitoy iti US Embassy.
Segun pay ken ni Peña, pangulo ti Philippine Overseas Labor Office (POLO) iti Los Angeles, nakasaritana ni David Bersolia a pangulo met ti Department of Labor ti Guam maipanggep iti situasion ti trabaho iti nasao a teritorio.
TURISMO: Intayon Idiay Ayuyang Garden iti Pila, Siudad ti Laoag!
Segun iti daytoy, iti 11,500 a trabahador a kasapulanda, kalikagumanda a Filipino amin dagitoy. Kayatna a sawen, saandan a mangala manipud iti sabali a puli.
Innayon ni Peña a segun ken ni Bersolia, katibok ti panagawatda iti 2023 wenno 6,500 a Filipino a trabahador ti kasapulanda.
Segun iti daytoy, kaaduan nga aglukat a trabaho ket mainaig iti industria ti konstruksion. Kasta met nga adda aglukat a trabaho para kadagiti journalists ken accountants nupay bassit laeng.
Partikular a dinakamat ni Peña a kasapulan dagiti electricians, welders, mekaniko iti HVAC (heating, ventilation and air-conditioning) ken repriheradora, construction equipment mechanics, plumbers and pipe fitters, operating engineers wenno heavy equipment operators, ken karpintero, reinforcing metal workers, mason, structural steel workers, camp cooks, ken amin a kita ti inheniero.
Segun iti Labor Attaché, malaksid iti panangala iti visa, napateg a makaala ti interesado iti lisensia ken umisu a kabaelan ken padas iti trabaho no kayatna ti makapagtrabaho iti Guam.
Kuna ni Peña a kalikaguman daytoy a maideploy amin a maawat a Filipino ta magusgustuanda dagiti Filipino no idilig iti sabali a pili.
Teritorio ti US ti Guam, maysa a puro ti Micronesia iti Taaw Pasipiko. Kadagiti amin nga agindeg ita iti Guam, ti puli a Filipino ti maikadua a kaaduan, mapan a nasursurok ngem apagkapat kadagupan ti nakurang a 160,000 a populasion ti nasao a teritorio.
(Damag manipud iti Manila Bulletin.)
