Ni LEILANIE G. ADRIANO

SIUDAD TI LAOAG – Saan a basbassit ngem 50 nga ubbing iti Barangay Lagui-Sail, Laoag City a sumrek iti day care iti daytoy a panageeskuela ti kaudian a naparaburan iti daytoy narugian a programa ti panagmiminnaro nga aglatlataken iti Ilocos Norte.

Itay Hulio 7, 2021, nakaawat ni Ysabel Pastor, 4 anios, ti Sitio West, iti kaunaan a krayolana agraman dagiti lapis, pagsuratan, pagtahar, pagpugas, ken pakete ti multivitamin syrup manipud iti grupo dagiti polis iti Ilocos Norte a nangidaulo iti daytoy nga aktibidad ti panagisagut.

PARABUR TI MARO. Mairaman dagitoy nga ubbing iti Brgy. Lagui-Sail, Laoag City (a nagiinnaddayo a nagpaala iti ladawan, kas pagtungpal iti annuroten iti salun-at) kadagiti naipaayan kadagiti masapsapulda iti panagbasada manipud iti A&A Foundation ken iti Ilocos Norte 1st Provincial Mobile Force Company. Napataud dagiti naidonar a masapsapul iti eskuela babaen ti online barter system a kas koma ti sangakilo a kalamansi, maisukat iti pagsuratan a papel, lapis wenno krayola. (LEILANIE G. ADRIANO)

Maysa laeng ni Ysabel Pastor kadagiti ubbing a sumrek a day care iti Barangay 54-A Lagui-Sail a naparaburan manipud iti napagbiag a sistema ti barter wenno panagmiminnaro a pinalatak ita dagiti Ilokano iti wagas a digital.

Imbes a basta buyaenna a malungsot dagiti bunga ti kalamansina gapu iti kinaawan nga aggatang ken sobra a suplay, inkeddeng ni Police Senior M/Sgt. Noel Abad nga agiray met iti panagtalon ken residente ti Barangay Pila daytoy a siudad, nga idiaya dagiti bunga ti kalamansina a sukat dagiti masapsapul iti eskuela dagitoy nga ubbing.

Nakipaset ngarud iti maysa a pribado nga online group a naawagan iti “Maru Ilocos Barter” a pagsasarakan dagiti rinibu a kameng a mangidiaya kadagiti produkto wenno serbisioda a kas sukat ti sabali ngem awan ti maaramat a kuarta para iti ania man a transaksion.

Kalpasan ti pannakaipaskil dagiti pagannurotan ti grupo a nakailanadan ti “pannakaimaro ti sangakilo a kalamansi para iti lima a pad ti papel a para Grado 1 wenno innem a pedaso a lapis wenno uppat a pedaso nga eight-color a krayola,” inaprobaran ti sumagmamano a kameng ti nasao a deal ket napagnunumuanda ti agkikita iti napagnunumuan a lugar ken oras tapno agmiminnaroda.

Kuna ni Abad a tinawen a mangiwaywayat iti programa iti panangipaay iti sagut kadagiti ubbing. Itoy a gundaway, immarona ti bunga ti kalamansina a para kadagiti masapsapul dagiti ubbing.

Kuna ni Christine Joy Salvador, maysa a naubing pay a negosiante ken akinkukua iti Good Vibes Cafe ken administrator ti Maru Ilocos Barter, a maragsakan tunggal ibinglay ti maysa a kameng ti padasna kalpasan ti naballigi a deal.

Tapno nalaklaka ti tunggal maruista (awag ti maysa a kameng ti Maru Ilocos Barter) ti makisinnukat iti aytem, ididiaya ni Salvador ti shop daytoy iti likudan ti Provincial Capitol a pagkikitaan dagiti kameng nga agminnaro.

Kuna ni Salvador a maragsakan ta iti baet ti krisis, agari ti kinaimbag ken kinaparabur bayat ti panangistoriana iti padas ti maysa a naubing pay nga ina manipud iti ili a Burgos, mapan a maysa nga oras ti biahe a mapan iti Siudad ti Laoag, a nangimaro kadagiti masapsapul iti eskuela para iti tallo a kilo a bunga ti kalamansi.

(Immuna a naipablaak iti Agosto 1-15, 2021 a bilang ti Bannawag.)