Ni ANALOU DE VERA
Impakaammo ti Department of Health (DOH) ita a Domingo, Agosto 15, ti kaaddan ti Lambda a variant ti coronavirus iti Filipinas.
Kuna ti DOH a ti umuna a kaso ti Lambda variant ket maysa a 35-anios a babai ken mapalpalutpot no adda a mismo iti pagilian wenno nagawid ditoy pagilian manipud iti ballasiw-taaw.
Innayon ti DOH nga asymptomatic ti kaso ken maibilang a nalainganen ti nasao a babai kalpasan ti panagdalanna iti 10-aldaw a pannakuarantina. Iti pannakasursurat daytoy, iwaywayat ti DOH ti back tracing ken case investigation.
Immuna a naduktalan ti Lambda variant iti Peru idi Agosto 2020 ken madama a klasipikado iti World Health Organization (WHO) a kas Variant of Interest (VOI).
Manipud Kadagiti Agdama a Kameng ti Bannawag: Dios ti Agngina!
Segun iti DOH, addaan daytoy a VOI iti potensial a mangapektar a kas iti kinapartak a makaakar ti SARS-CoV-2 ken madama a mamonmonitor ti dadduma pay a kababalin daytoy.
Kabayatanna, agtultuloy ti yaadu dagiti maim-impektaran iti Delta variant iti Filipinas ta iti daytoy nga aldaw, nairekord ti 182 a baro a kaso. Iti daytoy a bilang, 112 ti kaso iti lokalidad, 36 dagiti nagawid nga overseas Filipinos (ROF), ken 34 a kaso ti maberberipikar no kaso a lokal wenno ROF.
Impakaammo pay ti DOH ti pannakaduktal ti 41 a kaso ti Alpha variant, 66 a kaso ti Beta variant, ken 40 a kaso ti P.3 variant.
(Damag manipud iti Manila Bulletin.)
