Ni MARTIN SADONGDONG
Rambakan dagiti Filipino ti “nasayaat” a Paskua iti daytoy a tawen iti laksid ti nakadadanag a panagadu dagiti biktima ti coronavirus disease (COVID-19) a mapapati a gapu iti panagwaras ti Delta variant a nalaka a makaakar.
Daytoy ti impanamnama ni Sec. Carlito Galvez Jr., vaccine czar ken chief implementer ti National Task Force (NTF) Against COVID-19, babaen ti maysa a pakaammo iti daytoy a Sabado, Agosto 14, bayat ti panangipaganetgetna ti kinapateg ti pannakapadaras ti programa ti panagbakuna iti pagilian, nangruna iti National Capital Region (NCR) a nairekord nga addaan iti kaaduan a kaso ti baro nga impeksion.
Segun ken ni Galvez, posible a matun-oy ti "nasayaat" a Paskua nangruna itan ta adun a lugar ti napartak ti panangisayangkatda iti panagbakuna idinto nga agtultuloy met ti isasangpet dagiti suplay ti bakuna.
Iti daytoy Hunio, imparipirip ti Malakanyang a posible a marambakan ti Paskua a saanen nga agsuot iti face mask dagiti tattao ngem nalawag a saan a mapasamak daytoy gapu iti madama a mapaspasamak a pannakairekord dagiti kangatuan a bilang ti kaso iti inaldaw, segun iti rekord ti Department of Health (DOH).
Manipud Kadagiti Agdama a Kameng ti Bannawag: Dios ti Agngina!
Iti daytoy Sabado, nairekord ti Department of Health (DOH) ti maikadua a kangatuan nga inaldaw a bilang a 14,249 a baro nga impeksion. Ti kangatuan a bilang iti maysa nga aldaw ket nairekord idi Abril 2, 2021 iti bilang a 15,310 a kaso.
Puntiria ti nailian a turay a bakunaan ti mapan a 77-milion a Filipino, wenno 70 a porsiento ti 111-milion a dagup ti populasion iti arinunos ti tawen tapno matun-oy ti herd immunity.
Segun iti World Health Organization (WHO), mailadawan ti herd immunity a kas kita ti indirekta a proteksion no ti umdas a porsiento ti populasion, addaanen iti proteksion iti makaimpektar a sakit babaen ti bakuna.
Segun ken ni Galvez, mapapati a matun-oy ti NCR ti herd immunity iti daytoy Septiembre gapu iti napapartak a panagbakuna dagiti adu a local government units (LGUs).
Innayon daytoy a ginundawayan ti gobierno ti maipakpakat ita nga enhanced community quarantine (ECQ) nga istatus ti NCR tapno mapapartak ti panagbakuna ken maiwayat ti di nababbaba ngem 250,000 a panagbakuna iti inaldaw.
Iti pannakasursurat daytoy, mapan a 220,000 a dosis ti maibakbakuna iti inaldaw iti NCR.
Kuna ni Galvez a nangipatulod ti NTF iti 3.5-milion a dosis iti daytoy a bulan iti NCR kas sungbat iti dawat ti nasao a rehion nga uppat a milion a dosis nga alokasion bayat ti tiempo ti ECQ nga agpatingga iti daytoy Agosto 20.
Kuna ni Galvez a plano ti NTF a pagbalinen nga innem a milion a dosis ti alokasion ti NCR tapno kompleto a mabakunaan ti 50 a porsiento a residente iti Kamanilaan iti arinunos ti Agosto.
Nasurok a 9.6-milion a residente ti NCR ti kualipikado a mabakunaan. Iti agdama, 41 a porsiento kadagitoy ti kompleton a nabakunaan idinto a 59 porsiento kadagitoy ti nakaawaten iti umuna a dosis.
Segun ken ni Galvez, napateg a kompleto a mabakunaan ti 50 a porsiento tapno dakdakkel ti tiansa a maikabassit ti maimpektaran iti COVID-19.
Nasurok a 1.7-milion a kaso ti COVID-19 ti nailistan ti DOH iti entero a pagilian.
Iti sabali a bangir, nasuroken a 12-milion a Filipino ti naipaayanen iti kompleto a bakuna idinto a 14-milion ti naipaayanen iti umuna a dosis.
(Damag manipud iti Manila Bulletin.)
