SIUDAD TI LAOAG – Mangipaay ti Turay ti Ilocos Norte iti premio kadagiti barangay a makapagtalinaed iti sero a kaso wenno makaikabassit iti bilang ti kaso ti coronavirus disease 2019 (COVID-19).
Iti maysa a pakaammo itay Domingo, Agosto 15, kinuna ni Gobernador Matthew Joseph Manotoc a panggep ti Barangay Incentivization Program (BIP) ti mangipaay iti cash nga insentibo kadagiti ‘kasiglatan’ a lokal a komunidad a makatengngel iti panagwaras ti bayrus kadagiti masakupanda.
Segun ken ni Manotoc, ipaayda ti gunggona kalpasan ti makabulan (manipud iti pannakaipakaammo ti nasao a premio).
Iti babaen daytoy a programa nga addaan iti uppat a level ti premio a cash a mapan a P30,000 agingga iti P120,000, ti barangay a makaipakita kadagiti kasayaatan a wagas iti panangikabassit kadagiti kaso ti COVID-19 maibasar iti color category ti lebel ti impeksion iti kada porsiento ti populasion nga addaan COVID-19, magunggonaan kalpasan ti makabulan wenno manipud Agosto 15 agingga iti Septiembre 15.
Ti color category ken deskripsionna: berde para iti low spread, amarilio para iti moderate spread, naranghado (orange) para iti high spread, ken nalabaga para iti very high spread.
Mannurat ti Bannawag Clotilde C. Alzate, rinambakanna ti maika-100 a panagkasangayna
Iti agdama, dua a siudad ken 21 nga ili iti Ilocos Norte malaksid iti Adams ken Carasi ti adda iti kaigetan a klase ti pannakakuarantina gapu iti agtultuloy a panagadu ti kaso ti COVID-19.
Iti pannakasursurat daytoy, addaan ti Ilocos Norte iti 4,261 nga aktibo a kaso, wenno paset ti dagup a kaso a 12,075 manipud nangrugi ti pandemia itay napan a tawen. Adda metten limmaing a 7,658 idinto a 156 ti natay.
(Damag manipud iti Philippine News Agency ken Manila Bulletin.)
