Ni CHARISSA LUCI-ATIENZA
Nakipinnirma ti Department of Science and Technology (DOST) iti memorandum of understanding (MOU) iti Local Government Unit (LGU) ti Ilagan City ken Isabela State University (ISU) para iti implementasion ti proyekto a pannakapartuat ti Hybrid Electric Road Train (HERT).
Naiwayat ti pinnirma iti MOU itay Agosto 11.
Kinuna ni DOST Secretary Fortunato “Boy” T. de la Peña iti virtual meeting a naangay idi Hunio 29 kadagiti opisial ti ISU ken ti DOST-Metals Industry Research and Development Center (MIRDC) nga impeksa ni Ilagan City Mayor Josemarie Diaz ti ayatna a mangadaptar iti HRET. Dinebelop ti DOST-MIRDC ti nasao a road train.
Iti mensahe daytoy, kinuna ni De la Peña a babaen ti HERT, mangnamnama ti DOST a maipaay daytoy ti pagimbagan dagiti umili ti Ilagan City, nangruna ti pannakaipaay iti daytoy ti maysa a pasilidad ti transportasion a mausar ti kaaduan ken di makadangran iti aglawlaw.
Manipud Kadagiti Agdama a Kameng ti Bannawag: Dios ti Agngina!
Agatiddog ti HERT iti 40 a metro nga addaan iti lima a nagsisipol ken de-aircon a bagon ken makailugan iti mapan a 240 a pasahero iti kada biahe, no di masurot dagiti protocol iti pandemia.
Innayon ni De la Peña nga amano ti HERT a mangsupusop iti agdama a sistema ti transportasion iti Siudad ti Ilagan ken dakkel a tulong a mangalay-ay kadagiti maap-appelan a kalsada iti siudad.
Kinuna pay daytoy a mabalin a mausar ti HRET a pagluganan dagiti frontiners ti coronavirus disease (COVID-19), nangruna iti tiempo ti lockdown a limitado ti para publiko a transportasion.
Segun pay iti daytoy, makatulong ti HERT iti pannakaikabassit ti polusion iti Ilagan City ken agbalin ti siudad a nataltalged a pagnaedan, pagadalan ken pagtrabahuan.
Inlawlawag ni De la Peña a naawagan a haybrid ti HERT ta imbes a basta agtaray babaen ti diesel fuel, patarayen daytoy dagiti elektroniko a bateria, ngarud basbassit ti mayula a karbon no maidilig kadagiti lugan a mapataray laeng babaen ti gasolina wenno krudo.
Kuna pay daytoy a makatulong ti HERT iti ad-adda pay nga idudur-as ti ekonomia ti Ilagan City.
Dinakamatna a makatulong met ti pannakapartuat ti HERT iti industria ti lokal panagpartuat ti Isabela. Mangipaay pay daytoy iti nayon a trabaho kadagiti inheniero ken agparpartuat. Mangnamnama pay daytoy a babaen ti HERT, maaallukoy dagiti dadduma a siudad nga agpaaramid met iti HERT para kadagiti umilida.
Innayon ni De la Peña a natalek daytoy nga agbalin nga ad-adda a makaay-ayo ti Ilagan City kadagiti imbestor. Gapu ta nainut ti pannakapartuat ti HERT ta aggapu iti pagilian dagiti partes daytoy, ad-adda a maawis dagiti imbestor a makipaset ken agpuonan iti siudad.
Kabayatanna, mangnamnama ni DOST-MIRDC Executive Director Robert O. Dizon nga agbalin ti Ilagan City a modelo ti HERT para kadagiti sabsabali pay a probinsia ken rehion iti pagilian.
Kuna ni Dizon a kalikagumanna a maipakita kadagiti sabsabali a lugar a kabaelan met ti bukodtayo a teknolohia ti pannakapartuat ti kakastoy a lugan.
Sagudayen ti MOU, agbalin ti ISU a paset ti consortium a mangiwayat kadagiti aktibidad iti Research and Development (R&D) ken S&T ti proyekto.
(Damag manipud iti Manila Bulletin.)
