OTTAWA, Canada — Impakaammmo ti Health Canada, ti departamento iti Canada a mainaig iti salun-at, nga inaprobaranen daytoy ti pannakausar ti Moderna a bakuna kontra iti COVID-19 kadagiti agtutubo nga agtawen iti 12 agingg iti 17 itay Biernes, Agosto 27.
Immun-unan a naaprobaran ti nasao a bakuna iti pagilian a Canada para kadagiti nataengan nga agtawen iti 18 agpangato idi Disiembre 2020.
Kalpasan ti naiget a pannakarepaso dagiti ebidensia, kuna ti Health Canada a naikeddeng daytoy a natalged ken epektibo ti bakuna iti pananglapped iti COVID-19 kadagiti agtutubo nga agatawen iti 12 agingga iti 17.
Inaprobaran ti Health Canada ti bakuna a Pfizer para iti COVID-19 para iti nasao a grupo ti edad idi Mayo.
Manipud Kadagiti Agdama a Kameng ti Bannawag: Dios ti Agngina!
Nupay ad-adayo ti posibilidad nga agsakit iti nakaro dagiti ubbing gapu iti COVID-19, dinakamat ti Health Canada ti kinapateg a mabakunaan dagitoy ta mabalin nga agsakitda latta, maimpektaran dagitoy ken saanda a maaddaan kadagiti sintoma, mayakarda ti bayrus iti sabali, ken mabalin a maaddaanda kadagiti agpaut nga epekto no maakaran dagitoy iti COVID-19.
Innayon ti Health Canada a dagiti ubbing ken agtutubo nga addaanen kadagiti sagubanit, mabalin a nangatngato ti risgo a maaddaan dagitoy iti nakarkaro a sakit gapu iti COVID-19.
Iti kaudian a rekord ti Health Canada a nagpatingga iti Agosto 27, 76.9 a porsiento kadagiti agtutubo nga agtawen iti 12 agingga iti 17 ti natudokanen iti maysa a dosis ti bakuna idinto a 63.57 a porsiento ti nabakunaanan iti dua a dosis.
Iti nasao a pagilian, awan pay ti naaprobaran a bakuna iti COVID-19 para kadagiti naub-ubing ngem edad 12. Kuna ti Health Canada a maisaysayangkat pay laeng dagiti clinical trials tapno maammuan ti kinatalged ken kinaepektibo ti bakuna para iti nasao a grupo ti edad.
Inreport ti Canada a naaddaan iti 1,461 a baro a kaso ti COVID-19 idi Agosto 27, a nainayon iti dagup a 1,484,144 a kaso, agraman ti 26,881 a pimmusay, segun iti CTV.
Manipud iti Hulio 30, agtultuloy ti yaadu ti inaldaw a kaso ti COVID-19 iti Canada. Segun iti Public Health Agency ti Canada itay Agosto 27, aganay a 2,848 a kaso ti kaudian a nailian nga average iti pito nga aldaw manipud iti Agosto 20 agingga iti 26, wenno 29 a porsiento ti ngimmatuanna no idilig iti napalabas a lawas.
Kalpasan ti sumagmamano a lawas a yaadu ti naakaran iti COVID-19, nangrugi metten ti panagngato ti kinakaro ti kaso iti nasao a pagilian, nangruna kadagiti saan a nabakunaan nga umili. Maibatay iti kaudian a rekord, mapan a 917 a katao ti matartaripato iti sakit a COVID-19 iti inaldaw iti Agosto 20-26.
(Damag manipud iti Xinhua ken Manila Bulletin.)
