Ni ELLALYN DE VERA-RUIZ
Walopulo ket siam a porsiento kadagiti Filipino ti agar-aruat iti face mask tapno maliklikanda ti maakaran iti coronavirus disease (COVID-19), segun iti surbey nga inwayat ti OCTA, maysa nga independiente a grupo.
Maibatay iti surbey a Tugon ng Masa, ti panagaruat iti face mask ken regular a panangbuggo kadagiti ima iti danum ken sabon wenno alkohol dagiti kangrunaan pamuspusan dagiti Filipino tapno maliklikanda ti pannakaalada iti COVID-19, ket 89 a porsiento ken 85 a porsiento a Filipino ti mangiwaywayat kadagitoy, kas panagsaganadda.
Naiwayat ti surbey manipud iti Hulio 12 agingga iti 18, 2021 iti 1,200 a tattao.
Nadakamat pay ti sabsabali a pamuspusan a kas iti panagusar iti face shield (70 porsiento) ken panangsurot iti social distancing (64 porsiento).
Manipud Kadagiti Agdama a Kameng ti Bannawag: Dios ti Agngina!
Nupay kaaduan ti mangsursurot kadagiti public health standards, dinakamat ti OCTA a bimmassit dagiti mangsursurot kadagiti uppat a pamuspusan iti napalabas a bulan.
Dinakamat ti OCTA a kadagupan dagiti wagas a pangliklik iti COVID-19, ti panagusar iti face shield ti bimmassit iti mangsursurot iti daytoy; bimmaba iti 11 a porsiento iti napalabas a bulan.
Mainaig iti daytoy, 25 porsiento a Filipino ti nangliklik iti biahe iti uneg ti pagilian, idinto a 20 porsiento ti nagpakonsultar iti doktor wenno healthcare provider no adda madi a marikriknada.
Ti met panagtalinaed kadagiti pagtaengan ti ad-adda a nasursurot iti Metro Manila no idilig kadagiti sabsabali a lugar.
(Damag manipud iti Manila Bulletin.)
