Pimmusay ni mannurat ti Bannawag Solomon Vergara Benitez, 70, ti San Esteban, Ilocos Sur itay Agosto 30 gapu iti sakitna iti kidney.

Nangrugi a nag-dialysis ni Sol (awagna kadagiti kasingedna) idi 2019. Nadegdegan ti an-annayenna itay nabiit gapu iti panagpositibona iti COVID-19 ket nagtalinaed iti lima nga aldaw iti Ilocos Sur District Hospital iti Sta. Lucia, Ilocos Sur.

Nabayag a nagpapaay a kameng ti konseho munisipal, nagbise mayor, ken nag-acting mayor ti ilina a San Esteban ken nagprinsipal iti San Esteban Academy.

Inulila ni SVB dagiti dua a kakabsatna a sibibiag pay a da Nena ken Victorio, agpada nga agnaed iti Honolulu, Hawaii; ti kaingungotna a ni sigud a Eufemia Quileza, dagiti annakda a da Jerrold, Sheila, ken Lovela Joy, agpapada nga agnaeden iti Las Vegas, USA; ken dagiti mamanugang ken appokona. (Nepo Benitez, Jr.)