Ni BETHEENA UNITE
Inaprobaranen ti Food and Drug Administration (FDA) ti emerhensia a pannakausar ti bakuna a Moderna para iti COVID-19 kadagiti agtutubo nga agtawen iti 12 agingga iti 17 iti Filipinas.
Kinompirmar ni FDA Director-General Eric Domingo a naaprobaran iti daytoy Biernes, Septiembre 3, ti naamendaran nga autorisasion para iti emerhensia a pannakausar ti nasao a bakuna para kadagiti indibidual nga agtawen iti 12 agingga iti 17, dua lawas kalpasan ti aplikasion daytoy.
Segun ken ni Domingo iti maysa nga innuman, naaprobaran daytoy kalpasan ti naiget a panangarisit dagiti eksperto iti bakuna ken regulasion manipud iti FDA.
Nupay naaprobaranen ti bakuna para iti nasao a grupo ti edad, agbasar latta ti pannakabakuna dagiti indibidual kadagiti pagalagadan iti panagipangruna iti panagbakuna nga inkeddeng ti interagency task force (IATF).
TURISMO: Intayon Idiay Ayuyang Garden iti Pila, Siudad ti Laoag!
Segun ken ni Domingo, no inkeddengen ti DOH wenno IATF nga immaboten ti panagipangruna kadagiti naub-ubbing ngem 18 anios, isu pay laeng ti pannakabakuna dagiti edad 12 agingga iti 17.
Iti pannakabakuna dagiti agtutubo iti bakuna a Moderna, masurot latta dagiti kadawyan a panagannad. Masapul latta nga obserbaren dagiti doktor ken dagiti nagpabakuna a mismo ti ania man a kaso ti myocarditis, nupay manmano ketdi ti maaddaan iti daytoy kalpasan ti pannakabakunada.
Kabayatanna, kuna ni Domingo a nakasagana ti FDA a mangarisit iti aplikasion para iti sertipikasion ti Pfizer apaman nga agpaaprobar daytoy.
Inaprobaranen ti US FDA ti bakuna a Pfizer nga usaren dagiti agtawen iti 16 ken natataeng ken para iti emerhensia a pannakausar kadagiti agtawen iti 12 agingga iti 15.
Kuna ni Domingo a no nakaalan ti nasao a kompania iti sertipiko ti rehistrasion ti produkto wenno no naaprobaranen, kayatna a sawen a mabalin nga ilako kadagiti botika ken ospital, mabalinen nga ireseta ti doktor ti bakuna ken mabalinen a gatangen ti pribado a sektor.
(Damag manipud iti Manila Bulletin.)
