Ni LEILANIE ADRIANO
SIUDAD TI LAOAG – Impakaammo ti maysa a lokal a kompania ti bus nga agbiahe manen daytoy nga agpa-Metro Manila mangrugi iti daytoy a Domingo, Septiembre 5.
Impakaammo ti manarawidwid iti G.V. Florida Bus Lines (Florida) iti daytoy a Sabado nga agawatdan kadagiti agpareserba para iti ruta a Manila-Laoag nga agbiahe iti alas dies iti rabii tunggal Lunes ken Biernes ken ti ruta a Laoag-Manila nga agbiahe met iti alas nuebe iti rabii tunggal Domingo ken Huebes.
Iti innuman iti telepono, kuna ti staff ti nasao a kompania ti bus a ni Maylin Villalin a nakaawatdan kadagiti reserbasion ngem tapno manamnama ti kinatalged dagiti pasahero, maipalagip kadagitoy a masapul nga agtungpalda kadagiti quarantine protocols.
Kadagiti agbiahe a mapan iti National Capital Region, kuna daytoy a masapul ti negatibo ti resultana nga antigen test sakbay nga aglugan idinto a dagiti mapan iti probinsia, masapul a mangipresentarda iti negatibo ti resultana a reverse transcription-polymerase chain reaction (RT-PCR).
Manipud Kadagiti Agdama a Kameng ti Bannawag: Dios ti Agngina!
Innayon daytoy a ti resulta ti test, masapul a maala di nakurkurang ngem 48 nga oras (2 nga aldaw) sakbay ti biahe. Nasken met a mangipakita ti pasahero iti acceptance letter manipud iti local government unit ti ili a papanan.
Ti plete para iti ruta a Laoag-Manila ken Manila-Laoag ket PHP1,111, manipud iti PHP900 a plete sakbay ti pandemia.
Manipud pay idi Enero, impeksa ti probinsia ti Ilocos Norte a sisasagana daytoy a mangpasangbay kadagiti komiuter dagiti para pasahero a bus manipud iti Manila nga agturong iti Laoag ken Pagudpud, Ilocos Norte iti inaldaw ngem limitado ti bilang dagiti nangawat iti diaya gapu kadagiti restriksion iti panagbiahe.
Idi Abril, intuloy ti Florida ti biahe kadagiti ruta a Laoag-Manila ken Pagudpud-Manila ngem naisardeng ti operasion iti daytoy Hulio gapu iti panagsubli ti probinsia ti Ilocos Norte iti modified enhanced community quarantine gapu iti panagadu dagiti kaso ti COVID-19.
Kas iti iseserrek dagiti agawid a residente iti probinsia, kuna ni Cipriano Martinez, executive director ti Metro Ilocos Norte Council, a dagiti pasahero iti bus, maarisit dagiti papelesda iti border ti probinsia.
Kuna daytoy a sakbay ti panagbiahe ti pasahero, masapul nga ikoordinar daytoy ti isasangpetna dua aldaw sakbayna tapno maurnos ti iseserrek daytoy iti probinsia.
Masapul a maipakat met ti natalged a distansia iti nagbabaetan dagiti drayber, konduktor ken komiuter, ken maipalubos laeng ti 50 porsiento a kaadu ti pasahero ti bus.
(Damag manipud iti Philippine News Agency.)
