Ni MARTIN SADONGDONG
Posible nga ad-adu dagiti napateg nga aktibidad a mabalin nga aramiden dagiti indibidual a bakunado kontra iti coronavirus disease (COVID-19) iti daytoy a panangbaliw ti gobierno iti panangsarangetna iti pandemia ken iti panagpanggepna a panangipakat iti granular lockdown iti National Capital Region (NRC), kas kuna ni Ret. General Restituto Padilla Jr., spokesperson ti National Task Force (NTF) Against COVID-19 iti daytoy Lunes, Septiembre 6.
Kuna pay ni Padilla a ti pannakaisayangkat ti granular lockdown ket mabalin a wagas ti pagilian iti panagturongna iti “baro a normal” wenno iti baro a wagas ti panagbiag iti tiempo ti pandemia a COVID-19.
Innayon ni Padilla a panggep daytoy baro a sistema ti mangsalaknib kadagiti saan pay a nabakunaan, idinto a naluklukay met ti pannakapalubos dagiti bakunado nangruna no mainaig kadagiti napateg nga aktibidad.
Dinakamat pay ni Padilla a ti granular lockdown ti pamuspusan para iti in-inut a pannakapalukay dagiti restriksion kadagiti saan unay a nasken nga aktibidad a kas iti pannangan iti uneg ti restauran, kasar iti simbaan, seremonia ti pumpon ken dadduma pay.
Manipud Kadagiti Agdama a Kameng ti Bannawag: Dios ti Agngina!
Iti pannakasursurat daytoy, dagiti amin nga implementing guidelines iti daytoy a sistema ti granular lockdown, tingtingitingen pay laeng ti technical working group (TWG) ti NTF ket manamnama a mairuar dagitoy sakbay a marugian ti damo a pannakaipakatna iti Kamanilaan.
Ipadas ti gobierno nga ipakat ti granular lockdown iti NCR iti daytoy Mierkoles, Septiembre 8, a saan ket nga isaadna ti sangarehion iti lockdown gapu iti nakaro nga epekto daytoy iti ekonomia.
Segun iti agdama nga urnos, adda ti NCR iti modified enhanced community quarantine (MECQ) agingga iti daytoy Septiembre 7 a dagiti laeng authorized persons outside of residence (APORs) ti mapalubosan a rummuar kadagiti pagtaengan para kadagiti napateg nga aktibidad.
Dinakamat ketdi ni Padilla a sakbayna, naipakpakaten ti granular lockdown nupay iti sumagmamano a siudad laeng. Ti granular lockdown ket isu pannakaipatungpal ti naiget a lockdown iti partikular a pasdek wenno establisimiento, kalsada, barangay wenno sabsabali a bassit a purok a nangato ti kaso ti panagiinnakar, imbes a maideklarar ti enhanced community quarantine (ECQ) iti sibubukel a rehion.
No an-anagen, maitalek ti responsibilidad iti panangisaad kadagiti partikular a lugar iti lockdown iti ima dagiti opisial ti lokal a turay imbes a ti nailian a gobierno.
Itay lawasna, kuna ni Department of Trade and Industry (DTI) Sec. Ramon Lopez nga iti babaen ti granular lockdown, sumagmamano a purok nga addaan iti nangato a kaso ti panagiinnakar ti maisaad iti hard lockdown. Makategoria daytoy iti uppat a lebel, Level 1 agingga iti 4, ket ti Level 4 ti kaigetan kadagitoy.
(Damag manipud iti Manila Bulletin.)
