Nasken koma a saganaan ti pagilian ti kakaruan a mabalin a mapasamak a di pannakatun-oy ti kaadda ti herd immunity wenno ummong dagiti tattao a saanen a makaiwaras iti COVID-19.
“Maysa pay laeng a teoria ti herd immunity ken agbaliwbaliw ti bilangna. Itay napan a tawen, kunada a no adda 70 a porsiento ti populasion a kompleto ti bakunana, maliklikanen ti panagwaras ti angol. Ita, kunada a nasken a 90 a porsiento. Ngem inton bigat, mabalin a sabalinto manen,” kinuna ni Senador Imee Marcos iti pakaammo nga inruarna itay Septiembre 5.
“Ita pay, adun ti agkasapulan iti booster shots wenno maikatlo a dosis ti bakuna idinto a di pay nakaawat iti uray maysa laeng a dosis ti bakuna ti adu nga umili kadagiti nakukurapay a pagilian. Ti saludsod, kabaelan ngata dagiti agparpartuat iti bakuna nga ited ti suplay?” sinaludsod ni Marcos.
Malaksid iti mapagduaduaan a suplay ti bakuna a para iti sangalubongan, innayon ni Marcos a makadegdeg iti parikut iti pannakatun-oy ti herd immunity ti panagsakit uray pay dagiti dadduma a nabakunaan, ti pannakapataud dagiti ad-adu a baryant, ti di pay ammo a kapaut ti kinaepektibo ti bakuna, ken ti posible a pannakissay ti bilang dagiti mangtartaripato iti salun-at gapu iti panagserra dagiti ospital ken panagprotesta dagiti healthcare workers.
TURISMO: Intayon Idiay Ayuyang Garden iti Pila, Siudad ti Laoag!
“Kaykayatko ti agbalin a para idanon iti dakes a damag ngem ti para idanon iti palso a namnama. Kinapudnona, nagbalinen ti pandemia a kas iti panagrigrigat ni Sisyphus,” kinunana a ti kayatna a sawen, isu ti di maung-ungpot a pannakadusdusa ni Sisyphus iti mitolohia dagiti Griego babaen ti panangidurduronna iti dakkel a bato tapno maisang-atna laeng iti bantay ngem no dandanin makadanon iti tuktok, makaruskos manen ti bato isu nga iduronnanto manen nga ipangato ti dakkel a bato.
Mangnayon iti makapadanag a pasamak, kas kuna ni Marcos, ti panangipalubos manen ti pagilian, epektibo itay Septiembre 5, ti mabalin a yuumay manen ditoy Filipinas dagiti biahero nga aggapu iti 10 a pagilian, a malaksid ti India, inlista ti US a ‘Very High Risk’ wenno ‘High Risk’ dagitoy, ken impan met ti UK iti ‘Red List’ daytoy.
Maibatay iti rekomendasion ti Inter-Agency Task Force for the Management of Emerging Infectious Diseases (IATF), inaprobaran ni Presidente Duterte ti yuumay iti pagilian dagiti biahero manipud iti Bangladesh, Nepal, Oman, Thailand, India, Indonesia, Pakistan, Sri Lanka, Thailand, ken iti United Arab Emirates (UAE) ngem aglasatda ketdi iti panagamiris ken pannakaikuarantina.
Kuna ni Marcos nga iti laksid dagiti panagan-annad a maipakat, ti kinabassit pay ti bilang dagiti nabakunaan a Filipino a mapan a 13 a porsiento pay laeng iti populasion ti mangipakita a ti rekomendasion ti IATF ket “kinadarasudos, no di man malasado.”
Dinakamat ni Marcos a ti Estados Unidos, a nabakunaanen ti agarup 54 a porsiento ti populasionna, iparitna pay laeng dagiti saan nga imigrante a biahero manipud iti India, ken ibilangna ti Bangladesh, Malaysia, Nepal, Thailand, ken ti UAE a kas pagilian a ‘Very High Risk,’ idinto nga ibilangna met a ‘High Risk’ ti Indonesia, Oman, ken Sri Lanka.
Ti met United Kingdom, a mapanen a 65 a porsiento ti populasionna ti nabakunaanen, impanna ti Bangladesh, Indonesia, Nepal, Oman, Pakistan, Sri Lanka, ken Thailand iti ‘Red List’ daytoy,
“Bayat nga ikarkararagtayo ti pannakapasamak ti maysa a milagro ken pannakaagas, masapul koma a suportarantayo dagiti adda iti tay-ak ti pannaripato babaen ti panangbayad ti gobierno kadagiti utangna kadagiti ospital ken kadagiti healthcare workers iti kasapaan a gundaway, panangileppastayo iti pannakaadal ti pannakaaramat dagiti agas a kas iti Ivermectin, pannakairaman ti maikatlo a dosis ti bakuna (booster shots) iti nailian a badiet iti 2022, ken ti pannakaikadakkel ti pondo a para iti Research Institute for Tropical Medicine bayat a ti virology institute ket di pay nakapataud kadagiti bakuna nga aramidtayo a mismo ditoy Filipinas,” kinuna ni Marcos.
“Iti bukodtayo met a bagi, nasken a papigsaentayo ti naturalesatayo babaen ti kaadda ti umdas a pannaturog, di panangbaybay-a iti bagi nga agkurang iti likido, regular a panagwatwat, panangikkat iti panaginum ken panagsigarilio, panagtomar iti Bitamina C ken zinc, ken panamagbalinyo kadagiti nasustansia ken makapasalun-at a taraon a kas iti marunggay ken virgin coconut oil a kas paset ti dieta wenno ipapaunegtayo,” innayonna.
