Ni GABRIELA BARON
Linukatanen ti Department of Education (DepEd) ti online nga aplikasion para iti Senior High Voucher Program (SHS VP).
Kinuna ni Education Undersecretary for Finance Annalyn Sevilla itoy a Huebes, Septiembre 9, a babaen ti Department of Budget and Management (DBM), nakaala ti DepEd iti nayon a pondo para iti pannakaitultuloy ti pannakaisayangkat ti SHS VP kasta met dagiti dadduma pay a programa daytoy iti Government Assistance and Subsidies.
Iti pannakitinnulong ti Private Education Assistance Committee (PEAC), agawat ti DepEd kadagiti online nga aplikasion manipud iti Septiembre 9 agingga iti 23 babaen ti Online Voucher Applications Portal (OVAP).
Masapul a mangaramid dagiti aplikante iti account iti OVAP iti wenno sakbay ti Septiembre 21. Aggibus ti aplikasion inton Septiembre 23.
TURISMO: Intayon Idiay Ayuyang Garden iti Pila, Siudad ti Laoag!
Maipaskil met ti resulta inton Oktubre 11 ken iti mismo nga aldaw, mabalinen nga alaen dagiti kualipikado nga aplikante ti voucher dagitoy iti isu met laeng nga aldaw.
Kualipikado iti nasao a programa dagiti sumaganad:
1. Dagiti automatiko a kualipikado nga estudiante a saanen a masapul nga agaplay:
- Category A: Estudiante a nakakompleto iti Grade 10 iti SY 2020-2021 kadagiti para publiko nga eskuela ti DepEd
- Category B: Estudiante a nakakompleto iti Grade 10 iti SY 2020-2021 kadagiti state universities and colleges (SUCs) ken local universities and colleges (LUCs)
- Category C: Estudiante a nakakompleto iti Grade 10 iti SY 2021-2021 kadagiti pribado nga eskuela nga educational service contracting (ESC) grantees.
2. Dagiti aplikante para iti voucher a masapul nga agaplay:
- Category D: Estudiante a nakakompleto iti Grade 10 kadagiti pribado nga eskuela iti SY 2020-2021 a saan nga ESC grantees
- Category E: Estudiante a nakakompleto iti Grade 10 a nakompletona ti Grade 10 sakbay ti SY 2021-2021 ngem saan a nasapsapa ngem 2016 ken saan a sigud a nakaenrol para iti Grade 11
- Category F: Estudiante a nakapasa iti alternative learning system (ALS) accreditation and equivalency (A&E) Test para iti Grade 10 a saan a nasapsapa ngem 2016 ken saan a sigud a nakaenrol iti Grade 11 wenno ALS learners a nakapasa iti Presentation Portfolio Assessment
- Category G: Estudiante a nakapasa iti Philippine Education Placement Test (PEPT) para iti Grade 10 a saan a nasapsapa ngem 2016 ken saan a sigud a nakaenrol para iti Grade 11 wenno saan a mangala iti PEPT iti SY 2021-2022.
Para iti dadduma pay a detalye ken napateg nga impormasion mainaig iti SHS VP Application, mabalin a bisitaen dagiti aplikante ti ovap.peac.org.ph ken dadduma pay nga opisial a platform ti DepEd ken PEAC.
(Damag manipud iti Manila Bulletin.)
