Ni CHITO CHAVEZ
Manamnama a maipadas ti pannakausar ti “alert level” a restriksion iti National Capital Region (NCR) iti daytoy Septiembre 16 agingga iti 30, kas kuna ti maysa nga opisial ti Department of the Interior and Local Government (DILG).
Iti maysa nga innuman idi Biernes, Septiembre 10, kinuna ni DILG Undersecretary Epimaco Densing III a maipadas iti Metro Manila ti baro a panagannurotan a pannakausar ti Alert Level 1 agingga iti 5 iti panangikeddeng iti quarantine status ti maysa a lugar.
Kuna ni Densing a babaen daytoy baro a wagas, masukatanen ti immun-una a klasipikasion a pannakausar dagiti immuna a quarantine restriction a kas iti modified enhanced community quarantine (MECQ) ken modified general community quarantine (MGCQ).
Manipud Kadagiti Agdama a Kameng ti Bannawag: Dios ti Agngina!
Kinunana a daytoy baro nga annuroten ket "temporario" nga inaprobaran ti Inter-Agency Task Force (IATF).
Sagudayen ti baro a pagalagadan, ti Alert Level 5 ket hard lockdown a maipada iti enhanced community quarantine (ECQ) ken ipakat ti gobierno nasional a kas maudi a pamuspusan no umadu iti kasta unay dagiti kaso ti COVID-19.
Maipakat met ti Alert Level 1 agingga iti 4 kadagiti lugar nga addaan kadagiti granular lockdown.
Innayon ni Densing a maklasipikar dagiti industria a kas “3Cs’’ wenno “closed or indoor, crowded, and close contact” tapno maammuan no ania dagiti mapalubosan nga agtuloy ti operasionna kadagiti nadumaduma nga alert level.
No maipakat ti Alert Level 5, saan a mapalubosan nga agtuloy ti operasion ti kaaduan a sektor. No maipakat met ti Alert Level 4, saan a mapalubosan dagiti aktibidad ti 3C.
Maipalubos met dagiti aktibidad ti 3C iti 30 a porsiento no maipakat ti Alert Level 3; 50 a porsiento no maipakat ti Alert Level 2; ken siento porsiento nga agtuloy ti operasion no maipakat ti Alert Level 1 no la ketdi maipakat dagiti minimum a public health standards.
Dagiti industria a closed or indoor ket dagiti aktibidad nga indoor social/non-essential, klase iti eskuela nga indoor limited face-to-face, indoor a meetings, incentives, conferences, events (MICE), ken dagiti industria nga indoor cinemas and entertainment.
Dagiti met industria a crowded ket taripnong wenno panaggigimong a mainaig iti relihion, panagtitipon a kas kadagiti konsierto ken padaya, ken dagiti aktibidad nga agkasapulan iti maximum capacity ken physical distancing.
Dagiti met industria a close contact ket dagiti serbisio a personal care, pannangan iti uneg ti pasdek, ken dadduma pay nga aktibidad a saan a maipakat ti umisu a pannakausar ti personal protective equipment.
Kas insentibo, kinuna ni Densing a manayonan iti 10 percent capacity no addaan iti safety seal certification dagiti establisimiento a mapalubosan a mangituloy iti operasionda iti naikeddeng nga alert level.
Kuna pay ni Densing a dagiti 18 anios ken naub-ubing, 65 anios ken natataeng, masikog, ken dagiti addaan kadagiti medikal a kondision, maparitan a rummuar kadagiti lugar nga addaan iti Alert Level 4.
Kadagiti lugar nga adda iti Alert Level 2 ken Alert Level 3, kuna ni Densing a maitalek kadagiti maseknan a local government units (LGUs) ti pannakaipakat dagiti restriksion nga iti panagkuna dagitoy ket nasken idinto a maipakat met ti kalukayan a restriksion kadagiti lugar nga addaan iti Alert Level 1.
Impaganetget ni Densing a 20 a porsiento laeng nga empleado kadagiti opisina ti gobierno ti mapalubosan nga agreport iti opisina kadagiti lugar nga addaan iti Alert Level 4 idinto a 30 a porsiento, 50 a porsiento ken agarup 100 a porsiento ti mapalubosan a sumrek iti opisina kadagiti lugar nga addaan iti Alert Level 3, Alert Level 2 ken Alert Level 1, kas panagsasaganadda.
Nagutigot met dagiti pribado a kompania a manteneren dagitoy ti minimal a workforce iti opisina ken maipakat ti work from home idinto a mapalubosan ti maximum a bilang dagiti empleado kadagiti lugar nga addaan iti Alert Level 1.
Kuna ni Densing a daytoy panagbaliw iti pagalagadan, maysa a wagas para iti epektibo a panangikabassit kadagiti maakaran iti COVID-19 ta napaneknekan a nasamay dagiti granular lockdown iti pannakakontrol ti panagwaras ti bayrus.
(Damag manipud iti Manila Bulletin.)
