Ni ANALOU DE VERA
Linugayan ti Food and Drug Administration (FDA) ti addang ti sumagmamano a gobierno lokal (LGUs) iti panangiwayatda iti rehistrasion dagiti indibidual nga agtawen 12 agingga iti 17 para iti bakuna iti coronavirus disease (COVID-19).
Daytoy nga addang dagiti sumagmamano nga LGU ket panagsagana iti kanito nga ikeddeng ti nailian a turay a marugianen ti pannakabakuna dagiti agtutubo kontra iti COVID-19.
Iti maysa nga innuman itay nabiit, kinuna ni FDA-Director General Rolando Enrique Domingo a nasayaat nga addang daytoy dagiti LGU nga ita pay laeng, rugrugiandan ti panagparehistro dagiti agtutubo para iti pannakabakunada ta no ikeddengen ti DOH a mabalinen a mabakunaan dagitoy, madagdagus met ti pannakapaluspos dagiti bakuna a para kadagiti agtutubo.
TURISMO: Intayon Idiay Ayuyang Garden iti Pila, Siudad ti Laoag!
Mairaman kadagiti LGU a nangrugin ti panagrehistroda ti Pateros, Caloocan City, ken City of Manila.
Pinalubosanen ti FDA ti pannakausar dagiti bakuna kontra iti COVID-19 nga inaramid ti Pfizer-BioNTech ken Moderna para kadagiti edad 12 agingga iti 17. Nupay kasta, kuna ti DOH a saan pay a paset ti programa iti panagbakuna ti gobierno ti pannakabakuna dagiti agtawen iti 12 agingga iti 17 ta maipangruna pay laeng dagiti indibidual nga agrisgo iti nakaro a COVID-19 bayat ti panagur-uray iti umdas a suplay ti bakuna a para iti sibubukel a populasion.
Binalakadan pay ti DOH dagiti nataengan nga agpabakuna dagitoy kontra iti COVID-19 tapno masalakniban dagiti ubbing a kalangenlangenda kontra iti daytoy a sakit.
(Damag manipud iti Manila Bulletin.)
