Ni MERLINA HERNANDO-MALIPOT
Impatulod ti Philippine Red Cross (PRC) itoy a Lunes, Septiembre 13, dagiti “Bakuna Bus” daytoy iti Cagayan ken iti Cavite a kas paset dagiti gannuat daytoy a mangsuportar iti gobierno iti programa daytoy iti panagbakuna kontra iti coronavirus disease (COVID-19).
Naipatulod ti “Bakuna Bus” ti PRC iti Lal-lo, Cagayan tapno mabakunaan ti 500 nga indibidual. Iti met Cavite, naipatulod dagiti bus iti Imus tapno mabakunaan ti 600 nga indibidual idinto nga iti Naic, panggep ti PRC a mabakunaan ti 500 nga indibidual.
Kinuna ni PRC Chairman and Chief Executive Officer (CEO) Senator Richard Gordon a pagyamanan ken ipannakkelna dagiti amin a nagagaget a volunteers ken staff iti daytoy a naisangsangayan a gannuat.
Innayon ni Gordon a nagtalinaed a sikukumit dagiti volunteers ti PRC a tumulong kadagiti umili iti laksid dagiti adu a pannubok iti daytoy a pandemia. Ania man ti mapasamak, itultuloy dagitoy ti karida nga agserbi kadagiti umili a Filipino.
Manipud Kadagiti Agdama a Kameng ti Bannawag: Dios ti Agngina!
Iti kaudian a rekord a nagpatingga iti Septiembre 13, nakaipatuloden ti PRC iti sangapulo ket innem a “Bakuna” bus iti Luzon ken Visayas—11 ti manipud iti Victory Liner, lima iti UBE Express, ken dua manipud iti Ceres Liner.
Iti agdama, addaan ti PRC iti 20 a “Bakuna” Centers iti sibubukel a pagilian kalpasan ti kaudian a pannakaipadas daytoy iti Davao City idi Septiembre 11.
Kuna ti PRC a malaksid iti bakuna, ibaklayna amin a gastos iti babaen ti COVID-19 Vaccination Program ti gobierno a pakairamanan ti eringgilia, mobilisasion ken alawans dagiti agbakuna.
Dagitoy ti “Bakuna” Centers: PRC PLMC, PRC EDSA Boni, PRC Port Area, PRC Pasay Chapter, PRC Manila Chapter KABAKA, PRC Manila Chapter Letran, PRC Quezon City Ever Gotesco, PRC Negros Occidental Gaisano Grand, PRC Iligan Chapter PRC Zamboanga City Training Center, PRC Bulacan Chapter- BSU, ken PRC Batangas Xentro Mall.
Adda met iti PRC Cavite ti dadduma pay a center: PRC Cavite – SM Bacoor, PRC Cavite – Vista Mall Gen. Trias; PRC Tarlac – City walk Mall; PRC Olongapo – SM Downtown; PRC Bataan Chapter/Penelco; Arcovia; San Lorenzo Mall; ken PRC Davao City Chapter- Archdiocese Compound iti pannakitinnulong dagiti local government units (LGUs) a makasakup kadagitoy.
Mairaman met dagiti sumaganad a pakaipatulodan dagiti “Bakuna” bus: Marikina City, Mandaluyong City, Manila City, Navotas City, Caloocan, Lapu-Lapu City, Mandaue City, Cordova City, Talisay City, Naga City in Cebu, Bogo City in Cebu, Cavite, Batangas, Laguna, Rizal, Lucena iti Quezon, ken Bacolod City.
Iti kaudian a rekord nga agpatingga iti Septiembre 12, nakapagbakunan ti PRC “Bakuna Centers” ken “Bakuna Buses” iti 206,079 nga indibidual a mangipangpangruna iti A1 agingga iti A5 COVID-19 priority groups.
Para kadagiti indibidual nga interesado a mabakunaan, mabalin ti umawag iti 1158 wenno mangipatulod iti email iti [email protected].
(Damag manipud iti Manila Bulletin.)
