BAUKO, Mountain Province – Ti panangsurot kadagiti pagalagadan iti public health ti mangsalsalaknib iti daytoy a probinsia kontra iti Delta variant ti coronavirus disease 2019 (COVID-19), kas kinuna ni Governor Bonifacio Lacwasan, Jr.
Ti Mountain Province ti kakaisuna a lugar iti Cordillera Administrative Region (CAR) a saan pay a naimpektaran iti daytoy napartak ti panagwarasna a variant.
Iti kaudian a rekord a nagpatingga iti alas kuatro iti malem iti Martes, Septiembre 14, addaan daytoy iti kababaan a bilang ti aktibo a kaso ti COVID-19 iti 242 kadagiti 7,100 a kaso iti CAR.
Manipud iti 2020, nakairekord ti probinsia iti 5,239 a kaso ti COVID-19 ket 4,902 kadagitoy ti limmaing idinto a 95 ti pimmusay.
Manipud Kadagiti Agdama a Kameng ti Bannawag: Dios ti Agngina!
Bayat ti pannakarambak ti maika-35 nga anibersario ti Cordillera Peace Talks iti Mt. Data Hotel idi Lunes, Septiembre 13, kinuna ni Gobernador Lacwasan Jr. nga awan pay ti nairehistro a kaso ti Delta variant iti Mountain Province, banag a pagyamyamananda ken ni Apo Dios.
Segun ken ni Lacwasan, ammo dagiti residente ti ar-aramidenda ken nairuamdan kadagiti protocols. Itultuloyda a tungpalen dagitoy tapno nakasaganada a kanayon a mangsalaknib iti bagbagida manipud iti daytoy a pandemia.
Kalpasan ti umuna a quarter ti 2021 a pimlatokan ti kaso, kuna ni Lacwasan a nasursuro dagiti residente ti saan ng agkampante ken kanayon a likliklikan dagitoy ti maimpektaran.
Segun iti rekord ti Provincial Health Office, kaaduan kadagiti kaso iti nasao a probinsia ti pakainaigan dagiti biahero, nagawid a residente, ken autorisado a tattao iti ruar ti residente (authorized persons outside residence) a rummuar-sumrek iti probinsia.
Maipakpakat ita iti nasao a probinsia a kadagiti checkpoint, masapul a mangipresentar ti saan a residente iti vaccination card ken negatibo a resulta ti reverse transcription-polymerase chain reaction (RT-PCR) test.
Iti biang dagiti residente, uray maysa laeng kadagitoy ti ipresentarda.
Nupay kontrolado dagiti kaso, kuna ni Lacwasan a nakasagana dagiti pasilidad para iti temporario a panakataripato ken isolation.
Kuna daytoy nga agingga a saan nga umabot iti aggasut iti inaldaw, kabaelanda nga akomodaren dagiti pasiente.
(Damag manipud iti Manila Bulletin ken Philippine News Agency.)
