Ni HONOR BLANCO CABIE
1
kailiwko ita a rabii
dakkelko nga ina,* isut' innak
kamangan no riknak maipakpakni,
kalasagmi, kaduak 'toy karkarmak.
Manipud Kadagiti Agdama a Kameng ti Bannawag: Dios ti Agngina!
ammonan no umasidegak 'tay
barukongna sadiay isadagko
daytoy pispis, daras 'tay linglingay
agkarayam ingga 'ti mugingko.
ania man lua agpagus a matnag
mateppelan, sanggaen dagus 'diay
barukongna, am-amin a salbag
anian maparmekda mapirpirsay.
ita a rabii kailiwko
inak pagliplipiasan 'tay dungngo.
*ftb
2
makitak la ket ti inakon no
adda idi salugsog 'toy riknak
maitag-ay dagusen 'toy karkarmak,
maep-ep 'tay garumiad mugingko.
saanen a masapul 'tay inna
panagsao, ta umanayen 'diay
arakupna kaniak mangitag-ay,
mamagtalna 'toy muging ken rikna.
ngem kasano ngarud itan awan
metten inak a kamang mugingko
ken 'toy riknak, awan a sangpetak --
anian kaslaakon nayaw-awan.
isut' mangur-urnos panunotko,
isu pay 'tay mamagtalna't riknak.
