SIUDAD TI LAOAG – Sumagmamano a pasilidad ken restauran iti Pagudpud, Ilocos Norte ti mangididiaya iti agingga iti 25 a porsiento a diskuento iti bayad dagiti kuarto agraman ti libre a pamigat para kadagiti lokal a turista nga agpareserba iti daytoy a bulan.
Naidiaya daytoy kalpasan nga impalubos met laengen ti turay ti Ilocos Norte ti biahe para iti panagpallailang para kadagiti amin a residente daytoy nga awan ti pilpilienna nga edad, no la ketdi surotenda dagiti protokol iti salun-at ken kinatalged.
Manipud itay Septiembre 15, amin a residente kadagiti ili ti Adams, Bacarra, Badoc, Banna, Carasi, Currimao, Dingras, Dumalneg, Nueva Era, Pagudpud, Paoay, Pasuquin, Piddig, Pinili, San Nicolas, Sarrat, Solsona ken Vintar, napalubosanen a rummuar nga agbiahe para iti panagpallailang ta nagbalinen a general community quarantine (GCQ) ti sursurotenda a klasipikasion ti kuarantina iti komunidad.
Nagtalinaed ketdi dagiti siudad ti Laoag ken Batac, ken dagiti ili ti Bangui, Burgos ken Marcos iti modified enhanced community quarantine (MECQ), ti maikadua a kaigetan a kita ti kuarantina.
Manipud Kadagiti Agdama a Kameng ti Bannawag: Dios ti Agngina!
Siraragsak a nangipeksa iti gagarna a mangsarabo kadagiti turista iti baybay ti Saud, a maysa kadagiti kapipintasan a baybay iti lubong, mangnamnama ni Nelly Cristobal, presidente ti Federated Hotels and Resorts of Pagudpud Inc. ken akinkukua iti Casa Victoria resort a maibaba koma metten iti GCQ ti klasipikasion ti Siudad ti Laoag ta adda ditoy dagiti ad-adu a lokal a turista.
Para iti kinatalged dagiti turista, aganay a 73 nga establisimiento iti akomodasion iti ili ti Pagudpud ti addaanen iti espesial a permit nga agoperasion iti babaen ti baro a normal.
Nangisayangkat dagiti empleado ti Department of Tourism (DOT) ken Ilocos Norte Tourism Office iti naiget nga inspeksion kadagitoy a pasilidad sakbay a manglukatda manen.
Kuna ni Cristobal a nakapimpintas ti baybay iti Pagudpud ngem saan met a makapagpasiar ti amin ditoy. Mangnamnama ketdi nga umadu pay dagiti turista iti masanguanan, nangruna inton makontrolen ti pandemia a coronavirus.
Gapu iti panagadu ti maak-akaran iti napalabas a dua a bulan, naiserra kadagiti turista dagiti nadumaduma a lugar wenno buya iti probinsia a para kadagiti turista.
Sagudayen dagiti pagalagadan ti DOT, amin a parke ken lugar a pagpallailangan iti babaen ti GCQ, mapagtalinaed iti 50-porsiento a kapasidad.
(Damag manipud iti Manila Bulletin ken Philippine News Agency.)
