Maisubli iti enhanced community quarantine (ECQ), ti kaigetan a klasipikasion ti community quarantine, ti dua a siudad ken 19 nga ili iti probinsia ti Ilocos Sur iti dua a lawas manipud Mierkoles, Septiembre 22, gapu iti agtultuloy a panagadu ti kaso ti coronavirus disease 2019 (COVID-19).
Iti maysa a pammilin ehekutibo ni Governor Ryan Luis V. Singson itoy Lunes, Septiembre 20, dinakamatna ti nakadadanag a kinaalisto ti panagadu ti bilang dagiti residente ti probinsia a naakaran iti COVID-19.
Tapno mapaginad ti local transmission ken pannakayon ti agdama a 3,285 nga aktibo a kaso, a kaaduan kadagitoy ti frontliner ti gobierno, kuna ni Singson a masapul a maipakat ti ECQ kadagiti siudad ti Vigan ken Candon, kasta met dagiti ili ti Bantay, Cabugao, Caoayan, Del Pilar, Magsingal, Narvacan, Salcedo, San Ildefonso, San Juan, San Vicente, Santa, Santiago, Sinait, Sta. Catalina, Sta. Cruz, Sta. Lucia, Sta. Maria, Sto. Domingo, ken Suyo.
Dagiti saan a nadakamat a 13 nga ili, agtalinaed iti general community quarantine (GCQ) nga addaan iti napaiget a restriksion agingga iti Septiembre 30, kas mayannurot kadagiti pagalagadan ti Inter-Agency Task Force.
Manipud Kadagiti Agdama a Kameng ti Bannawag: Dios ti Agngina!
Manipud Septiembre 22 agingga iti Oktubre 6, malaksid no nasapsapa a maibabawi, maigetan dagiti residente ket mapalugodanda laeng a rummuar no gapu iti emerhensia wenno medikal a rason.
Innayon ni Singson a manayonan ti bilang dagiti unipormado a personnel a mangipakat kadagiti pagalagadan ti kuarantina.
Maiparit met ti amin a kita ti panagtataripnong malaksid no para iti pannakaipaay dagiti serbisio iti salun-at, serbisio ti gobierno wenno autorisado nga aktibidad para kadagiti umili.
Naikeddeng met ti curfew manipud alas nuebe iti rabii agingga iti alas singko iti agsapa, ken maiparit ti panaginum iti makabartek bayat ti tiempo ti ECQ.
(Damag manipud iti Manila Bulletin ken Philippine News Agency.)
