Daniw ni AMADO I. YORO
Ita a parbangon, iwakwakko ti ridaw
yegna ti birtud ti ur-urayek a bannawag
sukogan ti pakasaritaan, panagdaliasat.
Ita nga alas dies sanguek ti merienda, kiwarek ti kape
TURISMO: Intayon Idiay Ayuyang Garden iti Pila, Siudad ti Laoag!
isamirak nga asikasuen ni kasimpungalan
a mangsilpo’t  pakasaritaak, panagayat.
Ita nga agmatuon pagilasinan ti sang-atan
kas kadagiti rawis ti balligi
ken dagiti lansad ti pannakapaay, karit.
Mailasinda iti umay a panagligsay
a salogan ti biag iti desdes
dagiti nabirokak iti diamante, 77 a kasangay.
Daytoy ti alas kuatro sabali manen a merienda
isamirak latta a tulnekan teklado daytoy pc
dua, tallo wenno ad-adu man ti mayuritko, lagip.
kumiraosak bagas maisaang kasilpo ti anges-inanama
ti biag, pegpeg dagiti darikmat ti aldaw ken rabii
ti ilelennek saan a matawaran kas inkari ti nakaparsuaan.
Makitak ti agligsay a mangsuksukog iti umas-asideg a malem
iti sirsiripek nga init. dayta ti sardam: mariknak ti duayya
ti giteb ti pagorasan tanamitim ti isem panagyaman, naimbag a damag.
Damag a naimbag iti nayuritda a pagtuladan dagiti kas kaniak
nga agpagpagna;nga agmulmula kadagiti bukel ti imbag
nga aramid ti puso iti panagyaman, iti imbag-nakem; puso a managayat.
Parbangon manen: agyamanak sabali a pannakaipasngayko daytoy
nasarsaranta manen ti pul-oy iti ridaw ti umay a bigat
maibulos ti anges ti darikmat a mangyurit ti kambas ti biag
saanakto a mamingga a mangawit daytoy a krus
iti agnanayon a panagdaliasat itoy yanko a pagdagusan
kaduak man ita ni kasimpungalan iti katawa ken bunga ti lamisaan
ket sagpaminsan ti facetime dagitoy nga aw-awir;
dagiti kailiwna: da CJ Boy, Lia ken Josiah
iti ibit, iti sangit, iti katawa, iti ballasiw ti taaw
iti kararag, iti laem itoy a taeng: siakto, ket siakto
agtalinaed ken mabati a sipapakurang: tao, daga.
Daga, tapok: tao, di naan-anay.
