SIUDAD TI LAOAG – Addan pasilidad a pakaprosesuan dagiti kakaw nga apit dagiti agmulmula iti kakaw iti Adams, Ilocos Norte.
Agpateg iti nasurok a P1-milion ti naso a pasilidad, arapaap a pimmudno daytoy para kadagiti agmulmula iti kakaw iti ili ti Adams. Tulong daytoy manipud iti Department of Trade and Industry (DTI) a nanayonan iti P200,000 a kas pannakabagi ti Adams Cacao Growers and Processors Association Inc., maysa a grupo a kaaduan a kamengna ket babbai nga agmulmula iti kakaw wenno addaan iti plantasion ti kakaw ken kameng ti komunidad nga Indigenous Peoples (IPs).
Iti 18 a kameng daytoy, di nakurkurang ngem lima kadagitoy ti nakaawaten iti Good Agricultural Practices (GAP) a sertipikasion manipud iti Department of Agriculture–Bureau of Plant Industry (DA-BPI) iti 2019. Dagitoy ti Cardom’s Farm, Inuwayan Farm, Rona’s Farm, Yaoh’s Integrated Farm ken Wilma’s Farm.
Kuna ni Carmelita Abnasan nga akinkukua iti Cardom’s Farm itay Mierkoles, Septiembre 22, a dakkel a tulong kadakuada ti pasilidad a pagprosesuan tapno makaparnuayda kadagiti dekalidad a produkto a kas iti dark chocolate wenno cacao tablea, ken dadduma pay.
TURISMO: Intayon Idiay Ayuyang Garden iti Pila, Siudad ti Laoag!
Iti agdama, addaan ni Abnasan iti sumurok-kumurang a 100 a kapuon a kakaw iti bangkag daytoy ken panggepna ti agmula iti ad-adu pay ita ta addan ramit a makatulong iti panagprosesoda kadagiti apitda.
Mairaman kadagiti ramit a nayawat kadagiti addaan iti plantasion ti kakaw ti maysa a yunit a household type dehydrator, maysa a roaster machine nga addaan iti gas tank, disk grinder, maysa nga automatic piston funnel nga addaan iti compressor, maysa a vertical bond sealer, dua a yunit ti display cabinet ken chocolate melters, ken dadduma pay.
Nagyaman ni Vice Governor Cecilia Araneta-Marcos iti DTI iti suporta daytoy kadagiti addaan iti plantasion ti kakaw iti Adams. Impasingked daytoy ti tulong ti gobierno probinsial iti daytoy a proyekto.
(Damag manipud iti Manila Bulletin ken Philippine News Agency)
