Ni DENNIS PRINCIPE
Nangipaay ti nailian a turay iti kasapulan a tulong iti probinsia ti Batanes gapu iti kumarkaro a kasasaad daytoy maigapu iti COVID-19.
Iti maysa a paskil iti social media, naipakaammo a dinawat ni Batanes Governor Marilou H. Cayco iti Department of National Defense (DND) ti tulong iti transportasion a dagus met a naaprobaran.
Simmangpet ngarud iti probinsia itay Septiembre 25, Sabado, ti maysa a barko ti Philippine Navy manipud iti Sangley Point iti Cavite a naglaon kadagiti nadumaduma a suplay a kas iti bagas nga NFA ken bagas a komersial, 4,500 a food packs manipud iti DSWD ken nadumaduma a donasion manipud kadagiti agduduma a naparabur nga indibididual ken institusion.
Impaulog ti Batanes itay lawasna ti Executive Order No. 25 a nangisaad iti entero a probinsia iti Enhanced Community Quarantine (ECQ) manipud iti Septiembre 20 agingga iti Oktubre 4.
TURISMO: Intayon Idiay Ayuyang Garden iti Pila, Siudad ti Laoag!
Kabayatanna, iti pannakasursurat daytoy, addaan ti Batanes iti 204 nga aktibo a kaso.
Ti ili ti Basco ti kaaduan iti kaso iti nasao a probinsia nga addaan iti 147 nga aktibo a kaso.
Agpapaungar pay laeng ti probinsia manipud iti nakaro nga epekto ti Bagyo “Kiko” a nangsagsag ti lugar babaen ti angin nga agpigsa iti 265 a kilometro kada oras.
(Damag manipud iti Manila Bulletin.)
