Ni ELLSON QUISMORIO
Imbilin ni Presidente Duterte ti pannakairugin ti pannakabakuna kontra COVID-19 ti sapasap a populasion wenno dagiti amin nga umili iti husto nga edad, ken uray dagiti ubbing, mangrugi iti daytoy Oktubre.
Imbatad daytoy ni Presidential Spokesperson Harry Roque itoy a Martes, Septiembre 28, iti maysa a virtual press conference.
Kuna ni Roque a ti bilin ni Presidente, maibasar iti balakad ni vaccine czar Carlito Galvez. Kuna ketdi daytoy a sumarsaruno ti detalye maipapan iti daytoy, nupay agtultuloy met ti pannakaipangruna dagiti adda iti A1, A2, ken A3 a klasipikasion dagiti maipangruna a mabakunaan.
Kangrunaan a makagapu iti desision ti Presidente a mangipalubosen iti pannakabakuna ti sapasap a populasion ti kinaabunaw iti agdama ti suplay ti bakuna a COVID-19 iti pagilian.
TURISMO: Intayon Idiay Ayuyang Garden iti Pila, Siudad ti Laoag!
Kuna ni Roque a ti nagbalin a problema kadagiti napalpalabas a bulan ti kinakurang ti suplay a bakuna.
Maipapan met iti pannakabakuna dagiti ubbing, kuna ni Roque a mangrugi met laeng iti Oktubre nupay linawlawaganna a maaramid nga umuna ti pannakaipalista dagiti ubbing sakbay ti pannakabakuna dagitoy.
Saan ketdi a nangted daytoy iti detalye mainaig iti edad dagiti ubbing a kualipikado a mabakunaan, wenno ti brand ti bakuna a mausar kadagitoy.
Kiniddaw ngarud ni Roque kadagiti nagannak nga ikagumaanan dagitoy a maipalista dagiti annakda. Inton addan ti masterlist, isu metten ti pannakaipakaammo no asino dagiti umuna a mabakunaan.
Inwayat ti Filipinas ti programa iti panagbakuna kontra iti COVID-19 idi Marso 1, 2021.
(Damag manipud iti Manila Bulletin.)
