Dua a Daniw ni HONOR BLANCO CABIE
1
adut' naitulong ni angkuan iti
ing-ingungotenna nga ilida,
pasdek naruay, siluanda ti mata,
TURISMO: Intayon Idiay Ayuyang Garden iti Pila, Siudad ti Laoag!
isudat' lupos dagitay kari.
pinagpagadalna aduda pay,
naggappu't kaputotan awanan,
awan pulos sekkadna ni angkuan
nangyawat imana nangmurmuray.
idi pimmusayen nagayus lua
ti ilina, kailianna nga adu,
adut' nagsasaibbek, nagdung-aw,
adut' naibati nga ulilana.
'diay lua ti ilina isut' bato:
isut' batonlagip 'ti inaldaw.
2
sakbay pannakaidulin ni angkuan
inayabanda met a nagbitla
nakabalubalna't nagnagnaan,
adda kinapasnek, dinengngegda:
'ni angkuan ta adut' imbadangna
'ti ilina, kalugaranna pay,
natayog dagiti impasdekna,
ti ilitay inna intagtag-ay.'
ngem nagsardeng, timman-aw 'ti lungon,
'awanen kas ken mang angkuan,' inna
kuna, kas man nagsaksakdo't bubon,
'no la ket ta isun aginana.'
adda laingna 'diay pinagbitla,
ay! ngem adda met napagurana.
