Ni LESLIE ANN AQUINO
Adda pay tiempo para kadagiti saan pay a nakapagparehistro.
Inaprobaran ti Commission on Elections (Comelec) itoy a Mierkoles, Septiembre 29, ti pannakayalud-od ti panagparehistro dagiti botante agingga iti Oktubre 30.
Kuna ni Comelec Spokesperson James Jimenez a sangsangkamaysa nga inaprobaran ti En Banc ti nasao nga ekstension.
Iti maysa a pakaammo, mayalud-od ti rehistrasion manipud iti Oktubre 11 agingga iti 30, Lunes agingga iti Biernes, awan ti Sabado, malaksid iti maudi nga aldaw (Oktubre 30), 8 iti agsapa agingga iti 5 iti malem.
Manipud Kadagiti Agdama a Kameng ti Bannawag: Dios ti Agngina!
Iti maysa nga online nga innuman iti prensa, kuna ni Jimenez a maidiaya amin a kita ti serbisio para iti panagparehistro bayat ti rehistrasion.
Kaaduan a rehistrasion, maiwayat kadagiti opisina ti Comelec, ngem adda latta dagiti puesto ti Comelec kadagiti mall.
Innayon ni Jimenez nga adda pay met latta online reactivation.
Kasta met nga impakaammo ni Jimenez a nayalud-od iti dua a lawas ti panagparehistro dagiti overseas voters manipud iti Oktubre 1 agingga iti Oktubre 14. Saan ngamin nga apektado ti overseas voting iti panagipila iti COCs (certificate of candidacy) isu a marugian a dagus ti ekstension ti rehistrasion dagitoy.
Inkeddeng met ti Comelec a manipud iti Oktubre 1 agingga iti Oktubre 8 ti panagipila iti COC para iti eleksion a maangay iti Mayo 2022.
Iti orihinal nga iskediul, agpatingga iti Septiembre 30 ti panagparehistro dagiti botante.
(Damag manipud iti Manila Bulletin.)
