Ni LESLIE ANN AQUINO
Agannad kadagiti bogus a National Certificate (NC) a mailaklako kadagiti social media sites.
Kuna ti Technical Education and Skills Development Authority (TESDA) itoy a Mierkoles, Septiembre 29, a nakaawatda kadagiti report nga adda dagiti Facebook groups a mangididiaya kadagiti NCs para kadagiti nadumaduma a kurso a technical vocational para iti naituding a gatad ti kuarta.
Innayon dayroy a maidatdatag dagiti peke wenno bogus nga NC kadagiti employer a kas rekisito iti trabaho.
Iti maysa a pakaammo, kuna ni TESDA Secretary Isidro Lapeña a mayisyu laeng dagiti NC babaen dagiti opisina ti TESDA kadagiti kualipikado nga indibidual a nakapasa iti assessment.
TURISMO: Intayon Idiay Ayuyang Garden iti Pila, Siudad ti Laoag!
No mayisyu ti NC, agingga iti lima a tawen a balido daytoy, segun iti TESDA.
Kuna ni Lapeña a saan a mailako ti pudno nga NC. Adda karbengan ti maysa nga indibidual a makaala iti NC apaman a mairuarna ti competency assessment.
Binallaagan ngarud daytoy ti publiko a mabalin a beripikaren dagiti employer ti kinabalido dagiti NCs.
Innayon ni Lapeña a makikokoordinar ita ti ahensia daytoy kadagiti autoridad tapno matiliw dagiti agilaklako iti peke nga NCs.
Kiniddawna met ti publiko nga ireport dagitoy ti asino man nga ammoda nga aglaklako iti NC babaen ti yaawagda iti hotline a 8887-7777.
(Damag manipud iti Manila Bulletin.)
