SAN FRANCISCO, Calif., Estado Unidos — Impakaammo ti YouTube itay Huebes, Septiembre 30, nga ikkaten daytoy dagiti bideo ken sumagmamano a nalalatak a tattao nga addaan account iti YouTube a mangirakrakurak kadagiti palso nga impormasion maipanggep kadagiti aprobado a bakuna, kas paset ti kalikagum daytoy a mangtungday iti palso nga impormasion mainaig iti salun-at partikular iti COVID-19 ken dadduma pay a sakit.
Addan dagiti inikkat ti YouTube a paskil a mangiwarwaras kadagiti palso nga impormasion maipapan kadagiti pannaripato iti coronavirus disease agraman dagiti mangibagbaga a saan a natalged dagiti bakuna kontra iti COVID-19.
Segun iti pannakangiwat ti YouTube, maipasardeng ti channel ti sumagmamano a nalalatak a tattao a mangiwarwaras iti palso nga impormasion maipapan iti bakuna a kas kada Joseph Mercola ken Sherri Tenpenny kasta met kadagiti channel a mainaig ken ni Robert F. Kennedy, Jr.
Kuna ti YouTube a maikkat ti ania man a paskil a maikontra kadagiti madama a maibingbinglayen a bakuna a naaprobaran ken nakompirmar a natalged ken epektibo babaen dagiti lokal nga autoridad ti salun-at ken ti WHO (World Health Organization).
TURISMO: Intayon Idiay Ayuyang Garden iti Pila, Siudad ti Laoag!
Kasta met a naikkaten iti YouTube dagiti palso nga impormasion maipapan kadagiti regular a bakuna kontra kadagiti sakit a kas iti kamuras ken Hepatitis B.
Maipakat daytoy baro nga annuroten ti YouTube kadagiti vlogger a mangibagbaga a saan nga epektibo dagiti aprobado a bakuna ken inanaigda kadagiti nadadagsen a sakit nga epekto ti panagpabakuna.
Kuna ti YouTube a manipud iti napalabas a tawen, nakaikkaten iti mapan a 130,000 a bideo gapu iti pannakasalungasing dagiti pagalagadan daytoy mainaig iti bakuna kontra iti COVID-19.
Iti sabali a bangir, inyalnag met ti Facebook ti napabaro a rusat daytoy a mangsaranget kadagiti grupo nga extremist ken conspirators, babaen ti panangikkatna iti maysa a German network a mangiwarwaras iti palso nga impormasion mainaig iti COVID.
(Damag manipud iti Manila Bulletin ken Agence-France-Presse)
