Ni MERLINA HERNANDO-MALIPOT
Inlawlawag ti Departamento ti Edukasion (DepEd) a saan a maibilang nga "overtime" ti panagtrabaho dagiti mannursuro iti labes dagiti aldaw a panagklaseda.
“Ania man a panagtrabaho dagiti titser iti labes ti naituding a di nasursurok ngem 220 nga aldaw ti panagklase, saan a mabalin a singirenda ti bayadda a kas ‘overtime pay,’” kinuna ni DepEd Undersectary ken Chief of Staff Nepomuceno Malaluan bayat ti virtual press briefing a naangay itay Okt. 1. Kinuna ni Malaluan a sungbat ti DepEd daytoy iti kiddaw ti Alliance of Concerned Teachers (ACT) Philippines.
Kuna ti ACT a masapul a maited kadagiti mannursuro ti service credit iti tunggal aldaw a panagtrabahoda iti labes ti 220 nga aldaw a kaaddada iti klase ken nayon a a 25 a porsiento iti inaldaw a bayad dagiti titser para iti tunggal aldaw nga “overtime” a panagtrabahoda, kas ibilbilin ti Labor Code of the Philippines.
Nupay kasta, kuna ni Malaluan a “saan a mabalin nga umanamong” ti DepEd iti daytoy a kapanunotan ti ACT ta ti bilang dagiti aldaw a panagklase ket manipud dayta iti perspektiba dagiti estudiante. Kinunana a naituding ti di nasursurok ngem 220 nga aldaw a kaadda iti klase dagiti agad-adal tapno magun-odda dagiti namnamaen a paglaingan a para iti tukad ti adal a yanda.
TURISMO: Intayon Idiay Ayuyang Garden iti Pila, Siudad ti Laoag!
Innayon ni Malaluan a pagarigan nga iti panawen manipud iti Hunio agingga iti Septiembre 2020, sakbay ti panangrugi ti klase ken kalpasan a malpas ti bakasion iti kalgaw idi Mayo 31, 2020, “agpayso a nagtrabaho dagiti titser a kas iti panagpaenrolda, panagatendarda kadagiti panagsanay, panagisaganada kadagiti kasapulanda a mangisuro, panagplano iti organisasion dagiti klase, ken dadduma pay.” Ngem kinuna a para kadagitoy a serbisio nga impaayda, inawat dagiti titser ti regular a binulan a sueldoda.
“Ngarud, nasuelduanda para iti regular a walo nga oras a panagtrabaho iti inaldaw, a kas kasapulan kadagiti titser a kas met kadagiti dadduma pay a regular nga empleado ti gobierno, kinuna ni Malaluan.
Inlawlawag pay Malaluan nga iti pannakaibilang dagiti Sabado a kas aldaw a panageeskuela, kinunana nga iti pannakaipaulog ti school calenda, nalawag a naibaga a saan a mapilit dagiti titser nga agtrabaho para iti eskuela ken kasta met a a saan nga inkapilitan a mangisuroda iti aldaw ti Sabado ken Domingo.”
Dinakamatna pay a no masurokan man ti aldaw a panagklase, saan met a pagbatayan daytoy iti pannakanayon ti sueldo dagiti mannursuro a mabaybayadan para iti 12 a bulan a maibilang a sibubukel nga school year.
(Damag manipud iti Manila Bulletin.)
