Ni HILDA AUSTRIA

MALASIQUI, Pangasinan – Agdagup iti 33 barangay iti Rehion ti Ilokos ti mairaman kadagiti 1,406 barangay iti pagilian a mabenepisiaran kadagiti programa ken proyekto iti babaen ti Barangay Development Program (BDP) iti umay a tawen.

Iti maysa a birtual nga innuman nga insayangkat ti Philippine Information Agency-Ilocos Region itay napan a bulan, kuna ni National Security Council Undersecretary Vicente Agdamag a 27 kadagitoy a barangay ti manipud iti Ilocos Sur, ken sagdudua a barangay ti manipud iti Ilocos Norte, La Union, ken Pangasinan.

Kuna ni Agdamag nga itay napan a tawen, saan a nairaman dagitoy a barangay kadagiti benepisiario nupay napaneknekanen a kualpikado dagitoy kalpasan ti pannakabalidarda manipud idi 2016 agingga idi 2018.

Masapul a dagiti barangay a karaman iti BDP, adayondan iti pangta ti Communist Party of the Philippines–New People’s Army–National Democratic Front (CPP-NPA-NDF).

Kuna ni Agdamag a naibayag dagitoy a binalidar dagiti kameng ti polis ken armada ken ti Department of the Interior and Local Government.

Umawat ti tunggal maysa kadagiti agsagrap a barangay iti PHP20-milion ti pategna a proyekto a kas kadagiti farm-to-market roads, health centers, pannakapataud ti koriente, pasilidad ti danum ken sanitasion, eskuela, ken proyekto a pagbiagan. 

Dinakamat ni Agdamag a dakkel ti naipaay a tulong ti BDP kadagiti gannuat iti urnos ken talna ken panagdur-as. Kalpasan a naipaay dagiti proyekto kadagiti immun-unan a nabenepisiaran a barangay, nakaddidillaw a namimpinsan metten a nagpukaw ti impluensia ti CPP-NPA kadagitoy a lugar.

Ti BDP ti maysa kadagiti kangrunaan a proyekto ti National Task Force to End Local Communist Armed Conflict (NTF-ELCAC), maysa a sangapagilian a gannuat nga agpanggep a mangigibus iti terorismo iti sibubukel a Filipinas.

Idi Disiembre 2018, impaulog ni Presidente Rodrigo Roa Duterte ti Executive Order 70 a namagkakammayet kadagiti amin a sanga ti gobierno  tapno magibusanen ti 50 tawen a panagraira dagiti makakanigid a terorista a grupo.  Imbilangen ti Estados Unidos, European Union, United Kingdom, Australia, Canada, New Zealand, ken ti Filipinas ti CPP-NPA a kas terorista nga organisasion.

(Damag manipud iti Philippine News Agency.)