Pimmusay ni mannurat ti Bannawag Dexter Marin Fabito iti edadna a 43.
Maibatay iti paskil iti Facebook ti anakna a ni Zandra Fabito, pimmusay daytoy itay Lunes, Oktubre 4.
Kameng ti GUMIL Cagayan, maysa kadagiti chapter ti Gunglo Dagiti Mannurat nga Ilokano iti Filipinas ken Ballasiw-Taaw (GUMIL Filipinas), sumagmamano kadagiti daniw, salaysay ken saritana ti naipablaak iti Bannawag, Rimat Magasin ken Tawid News Magazine. Fellow iti 3rd Pasnaan, nangab-abak kadagiti salip iti panagsurat iti daniw ken sarita. Nairaman met dagiti sinuratna kadagiti antolohia nga impablaak ti Saniata Publications, GUMIL Cagayan, ken GUMIL Filipinas.
Tubo ti Balingit, Pamplona, Cagayan, nagpaay iti barangayna a kas kameng ti konseho ken kas sekretario. Nagserbi pay iti opisina ti Sangguniang Panlalawigan ti Cagayan.
Manipud Kadagiti Agdama a Kameng ti Bannawag: Dios ti Agngina!
Kas lirisista, pinutarna ti liriko dagiti dua a kanta ni Alexander Barut a “Mailiwak Kenka, Biagko” (nai-feature ni Noraline Domingo) ken “Dual Sim”.
Inulilana dagiti tallo nga annakna a da Zedrix, Zandra, ken Zachary. (Derick Marcel F. Yabes)
