Duaa Daniw ni HONOR BLANCO CABIE
1
'bumangonkan,' kas man ipukpukkaw
'diay init nga addaan lailo ti
im-imana, 'baron daytoy aldaw,
Manipud Kadagiti Agdama a Kameng ti Bannawag: Dios ti Agngina!
patiem a nalabsanen rabii.'
'ti imana a sumarsari 'ti
nagbaetan bulong ken kayo 'diay
barikir ta adda daytay kari,
adda 'tay sagut a makaitag-ay.
'o ili, wen, bumangonkan, addan
naikudi nga aldaw sika daytay
mangbakruy gasat 'ti pagpagnaan,
ngarud, sikan daytay agmurmuray.'
saan a sonat' arapaap ti
taktakderan ti ili ti puli.
2
adda lailona a mangriing
'diay init a sumingsingising 'ti
baet adu a kayo, 'tay kari
ta ibisbisongna iti pingping,
'bumangonkan, umaliwaksaykan,
o ili, dimon a lidliden pay
mata a nagbitbit panagliday,
tumakderkan, mapankan pagnaan.'
iti inna panangriing daytay
inudo ta sumngaw 'ti ngiwatna,
rikna ken muging a mayepyepyep
'ti turog dagusda mamurmuray.
'diay init ta adda isagutna,
adda lailo a rumakrakep.
