LAOAG CITY – Nagasmang dagiti probinsia ti Ilocos Norte ken La Union tapno maparegta ti agkakapsut nga industria ti turismo iti daytoy agtultuloy a tiempo ti pandemia.
Manipud iti Oktubre 8 agingga iti 10, maisayangkat ti peria iti panagbiahe ken negosio iti Robinson’s Place Ilocos, Alfresco Area tapno maitandudo dagiti nalatak a lugar para iti turismo iti agpada a probinsia.
Panggep daytoy peria a naawagan iti “I’m IN LUv Travel and Trade Fair” nga ibinglay dagiti kasayaatan a rumbeng nga aramiden dagiti turista a mapan iti Ilocos Norte ken iti La Union tapno natalged ti panagbiaheda iti baet ti sangalubongan a pandemia ken no ania met ti rumbeng nga aramiden dagiti umili kadagitoy a lugar.
Iti ipapan iti Ilocos Norte, kinuna ni Xavier Ruiz, officer-in-charge ti Ilocos Norte Tourism Office, a masapul laeng nga agparehistro dagiti turista iti online, mangala iti kabukbukodan a SafePass code ken ipresentar ti negatibo a resulta ti coronavirus disease 2019 (COVID-19) test.
Manipud Kadagiti Agdama a Kameng ti Bannawag: Dios ti Agngina!
Manipud itay Septiembre 24, agawat manen ti probinsia ti Ilocos Norte kadagiti turista, nga iti pannakaisursurat daytoy, addan nasurok a sangagasut a nagparehistro.
Kaaduan kadagitoy a turista ti agturong kadagiti napipintas a baybay iti nasao a probinsia, partikular iti ili a Pagudpud.
Kinuna ni Ruiz a natalged ti agpasiar iti Ilocos Norte gapu kadagiti maipakpakat a protocols iti salun-at ken kinatalged idinto nga inkarina nga ad-adda a makapagagar ita ti agpasiar iti probinsia. Mangnamnama pay daytoy nga umad-adu metten ti agbiahe ken agpasiar manen.
Kinuna met ni Ilocos Norte Governor Matthew Joseph Manotoc a mabalin a dumagas dagiti turista iti La Union sakbay nga agtungedda iti Ilocos Norte, wenno bise bersa.
Kas paset ti plano, posible a maangay dagiti padaya ken pabuya a pagbuligan ti Ilocos Norte ken La Union agraman ti panangallukoyda kadagiti naayat iti sports water a padasenda dagiti disso a mabalinda ti ag-surf a kas iti San Juan, La Union, ken iti Pagudpud ken Badoc iti Ilocos Norte.
Manipud nangrugi ti pandemia, adu a resort ken restauran ti nangisardeng ti operasionda ken manmano pay laeng kadagitoy ti nanglukat manen para kadagiti turista.
(Damag manipud iti Manila Bulletin ken Philippine News Agency.)
