Ni LIEZLE BASA IÑIGO
MADDELA, Quirino – Naileppasen ti agpateg iti 26.074-milion a pisos a kongkreto a kalsada nga agturong kadagiti talon ken bangkag iti Maddela, Quirino.
Proyekto daytoy iti babaen ti DPWH-Department of Trade and Industry (DTI) Convergence and Special Support Program, ti programa nga am-ammo a kas Roads Leveraging Linkages of Industry and Trade (ROLL IT) ken manamnama a mangipaay iti naparpartak a biahe nga agturong iti negosio, industria, ken economic zones ti lokalidad.
Nagyaman dagiti residente ti Barangay Cofcaville ken San Bernabe ti ili ti Maddela iti daytoy a proyekto ti nailian a turay babaen ti Department of Public Works and Highways – Quirino District Engineering Office (DPWH-QDEO).
TURISMO: Intayon Idiay Ayuyang Garden iti Pila, Siudad ti Laoag!
Kuna ni District Engineer Lorna B. Asuten a napateg ti proyekto iti komunidad ti Maddela ta agturong ti kalsada kadagiti bangkag a mamulmulaan iti mais, kahoy (cassava), saba, ken unas a mangipaay iti dakdakkel a maganar dagiti residente. Kasta met a nangipaay daytoy iti posibilidad nga ad-adda pay a mapasayaat dagiti agrikultural a daga a mangpadur-as met iti ekonomia.
Naponduan iti babaen ti GAA of 2021, maisilpo daytoy agatiddog iti 1.043 a kilometro a Divisoria Sur-San Salvador-Dungo Road iti Cordon-Aurora Road iti Aglipay ken Maddela iti Quirino.
(Damag manipud iti Manila Bulletin.)
