Ni ELISEO B. CONTILLO
Ti Sanidad-Tejada tandem, kaduada ni LMP Pres. ken Narvacan Mayor Luis "Chavit" Singson ken dagiti kandidato a para Sangguniang iti tiket ti Nationalist People's Coalition (NPC).
NARVACAN, ILOCOS SUR. Iti pammendision ni Mayor Luis “Chavit” Singson, nag-tandem ken nangipila iti kandidatura a para mayor ken bise mayor ti Narvacan da agdama a Bise Mayor Pablito Sanidad ken SBM Joseph Tejada.
Ti pannakaituloy dagiti adu a proyekto a mangitag-ay iti kasasaad dagiti umili ti Navacan ti arapaap nga itandudo ti grupo da VM Sanidad ken SBM Tejada.
Iti nasurok pay laeng a dua a tawen ti administrasion ni Mayor Singson, nairusat dagiti adu a proyekto ti impraestruktura a kas kadagiti moderno a health centers’ napalawa, napabaro, ken naluktan dagiti kalsada kadagiti barangay, nasuktan dagiti daan a rangtay, pasdek ti pagadalan, pasilidad para kadagiti ubbing ken nataengan, ken mamalpas payen ti baro a tiendaan, napasubli iti lokalidad ti panagtagikua iti Spanish Watchtower ken nadebelop pay daytoy a kas tourist spot, ken naisayangkat ti adu pay a proyekto a namaglupos iti lokalidad.
Dagitoy ti kalikagum nga ituloy da VM Sanidad ken SBM Tejada ken ti sibubukel a grupo iti panagpaidasigda iti umay a lokal ken national elections iti Mayo 9, 2022.
