Ni JHON ALDRIN CASINAS
Narugianen ti pannakabakuna kontra iti coronavirus disease (COVID-19) ti sapasap a populasion dagiti nataengan iti Filipinas, kas kuna ti Department of Health (DOH) itay Lunes, Oktubre 11.
Kuna ni Health Undersecretary Maria Rosario Vergeire nga addaanen ti Filipinas iti umdas a suplay ti bakuna para iti COVID-19 para iti pannakabakuna dagiti amin a nataengan, maibatay ken ni vaccine czar Secretary Carlito Galvez Jr.
Innayon ni Vergeire a dagiti pagalagadan iti pannakabakuna ti sapasap a populasion dagiti nataengan, maibatay iti immun-unan a naipaulog a resolusion ti Inter-Agency Task Force (IATF) ken memo ti DOH.
Inggunamgunam ketdi ni Vergeire a maipangruna latta a mabakunaan dagiti senior citizen ken dagiti addaan iti an-annayen (comorbidities) ta dagitoy ti kalakaan a kapten ti mapagbutbutngan a sakit.
Manipud Kadagiti Agdama a Kameng ti Bannawag: Dios ti Agngina!
Karaman iti A2 priority group iti programa ti pannakabakuna dagiti senior citizen nga agtawen iti 60 ken natataeng, idinto a dagiti addaan iti comorbidities wenno addan iti an-annayen, mairaman met iti A3 priority group.
Kasta met nga impalagip ti DOH kadagiti lokal a yunit ti gobierno (LGU) a mangisangratda iti espesial a pila wenno linia para kadagiti karaman iti nadakamat a dua a priority group.
Innayon ni Vergeire a makaammo met dagiti LGU no palugodan dagitoy a mabakunaan dagiti walk-in (wenno awanan iti naisakbay nga iskediul) wenno masapul pay ti rehistrasion.
Iti sabali a bangir, isagsaganan ti Departamento ti Salun-at (DOH) ti pannakabakuna kontra iti COVID-19 dagiti agtutubo nga agtawen manipud iti 12 agingga iti 17 nga addaan iti comorbidities, a mangrugi iti Oktubre 15.
Segun ken ni Vergeire, maisagsaganan dagiti masapsapul iti nasao a panagbakuna, kas iti pannakaisagana dagiti ospital a mairaman iti pannakaidamo ti pannakabakuna dagiti agtutubo.
Impalagip ni Vergeire a dagiti bakuna nga addaan iti mRNA platform a kas iti Pfizer ken Moderna ti mausar iti damo a pannakabakuna ti sektor dagiti agtutubo.
(Damag manipud iti Manila Bulletin.)
