Ni MERLINA HERNANDO-MALIPOT
Tapno magutigot ti ad-adu pay nga estudiante ken agtrabtrabaho kadagiti kolehio ken unibersidad nga agpabakuna kontra iti coronavirus disease (COVID-19), irusat ti Commission on Higher Education (CHED) ti maysa a vaccination caravan.
Kuna ni CHED Chairman Popoy De Vera iti virtual press briefing itoy a Mierkoles, Oktubre 11, a wagas daytoy a panangipakita iti kinapateg ti pannakabakuna ken tapno magutigot amin a mainaig iti edukasion iti tersaria a kas kadagiti estudiante, mannursuro, administrador, ken dadduma pay nga empleado dagiti kolehio ken unibersidad.
Iti daytoy a Mierkoles, Oktubre 13, nakaiskediul nga agbakuna ti CHED kadagiti estudiante iti Mabalacat City College ken Our Lady of Fatima University iti San Fernando, Pampanga. Segun ken ni De Vera, mapan a 1,500 nga estudiante ti mabakunaan.
Manipud Kadagiti Agdama a Kameng ti Bannawag: Dios ti Agngina!
Inton Biernes, Oktubre 15, bumisita met ni De Vera iti University of Southeastern Philippines iti Davao tapno imatanganna ti pannakabakuna ti 100 nga empleado ken 100 nga estudiante.
Iti umay a lawas, kuna ni De Vera a mapan a 300 nga atleta nga estudiante iti College of Human Kinetics ti University of the Philippines (UP) ti mabakunaan kontra iti COVID-19.
Innayon ni De Vera a mairaman pay a mabakunaan dagiti estudiante nga atleta iti National Collegiate Athletic Association (NCAA) ken University Athletic Association of the Philippines (UAAP) iti nadumaduma a lugar iti Metro Manila.
Iti kaudian a datos a napetsaan iti Oktubre 6, kuna ni De Vera a mapanen a 73 a porsiento dagiti empleado kadagiti 1,488 nga unibersidad ken kolehio iti pagilian ti nabakunaanen kontra iti COVID-19.
(Damag manipud iti Manila Bulletin.)
