Ni MARCELINO FRANCISCO D. SANTOS
Dua nga ubbing ken maysa a lakay manipud iti Suyo, Ilocos Sur, ti sapsapulen pay laeng dagiti autoridad agingga ita, Oktubre 14. Naammuan a nagpukaw dagitoy bayat ti kapigsa ti layus nga indateng ni Bagyo Maring iti nasao nga ili idi rabii ti Oktubre 11, Lunes.
Nainaganan dagiti dua nga ubbing a kas Gwen Misha ken Gab Merchanne, agpada nga agtawen iti 9.
Kinuna ni Eden Lucero Ramos, ikit dagiti dua nga ubbing, a kellaat a nagdinakkel ti Karayan Chico ket dinalapus ti narungsot nga agus ti balay dagiti ubbing nga adda iti igid ti karayan bayat ti pannaturogda a kaduada ti amada. Nakalasat ti ama ngem nagpukaw dagiti ubbing, a maigapu la ketdi iti panangyanud ida ti narungsot nga agus ti karayan.
Salvador C. Padsing
Malaksid kadagiti dua nga ubbing, nairaman a nagpukaw kabayatan ti layus nga indateng ni Bagyo Maring ti maysa a senior citizen iti Suyo met laeng. Nainaganan daytoy a ni Salvador Cadaeg Padsing, 67, naasawaan, mannalon, ken agnaed iti poblasion ti nasao nga ili.
Manipud Kadagiti Agdama a Kameng ti Bannawag: Dios ti Agngina!
(Manipud iti DZVV Bombo Radyo Vigan, PSSG Ar-jay de Guzman Ofiaza ti Suyo Municipal Police Station, ken Lorna Gironella Vizcarra [Annak (a Napudno) Ti Salcedo)]
