Ni ELLSON QUISMORIO
Iti umuna a gundaway manipud iti pannakaipakat ti coronavirus disease (COVID-19) Alert Level System (ALS), mapadasanen dagiti residente ti Metro Manila ti mapakatan iti alert level 3, a maipadas iti daytoy a rehion iti Oktubre 16, 2021 agingga iti Oktubre 31, 2021.
Ti Alert level 3 ti adda iti tengnga daytoy lima ti lebelna nga ALS. Impaulog ti Inter-Agency Task Force for the Management of Emerging Infectious Diseases (IATF) dagiti pagalagadan dagitoy itay rabii ti Mierkoles, Oktubre 13.
Maibasar kadagiti pagalagadan, kaibatogan ti alert level 3 dagiti lugar a nangato ti bilang dagiti kaso wenno agtultuloy ti panagngatona, nga addaan iti umdas a kama para kadagiti pasiente ken maipaay nga intensive care unit (ICU).
Iti daytoy a lebel, maluktanen dagiti pagsinean ken parke iti publiko nga addaan iti limitado a kapasidad manipud iti Oktubre 16.
TURISMO: Intayon Idiay Ayuyang Garden iti Pila, Siudad ti Laoag!
Iti pannakaipakat ti alert level 3, mapalubosan manen nga agpastrek dagiti sumaganad nga establisimiento/aktibidad para iti 30 porsiento a kapasidad kadagiti kompleto ti bakunada idinto a mapalubosan ti 50 a porsiento a kapasidad iti ruar ti pasdek:
– Dagiti pakaangayan ti miting, insentibo, komperensia ken eksibision (MICE);
– Dagiti addaan iti permiso a pakaangayan kadagiti okasion a kas iti parambak, resepsion ti kasar, parambak para iti nobio/nobia, anibersario ti kasar, parambak para iti debut ken kasangay, reunion dagiti pamilia, ken dadduma pay a parambak nga ipalubos ti turay.
– Dagiti pangawis kadagiti bisita ken turista a kas kadagiti libraria, arkibo, museo, galeria, eksibit, parke, plasa, hardin a para publiko, pagtan-awan iti napintas a buya, ken kapadada;
– Parke a pagpalpaliwaan;
– Pagpallailangan kas kadagiti internet cafe, pagbiliaran, arkadia, pagay-ayaman iti bowling, pagpanaan, pagdigosan a pool, ken kapadada a venue;
– Pagsinean;
– Limitado a face-to-face classes para iti tersaria ken tech-voc ken panagsanay;
– Personal a panagtataripnong para iti pammati wenno relihion, panagtitipon para iti minatay, massayag, panangidalimanek iti dapo ti minatay, ken pumpon para kadagiti natay uray saan a maigapu iti COVID-19 ken iti pannakapuor dagiti natay iti COVID-19;
– Eksamen nga iwayat dagiti sanga ti gobierno ken eksamen a palubosan ti IATF maibatay iti protokol;
– Pannangan iti uneg dagiti panganan a kas iti kiosk, komisiario, restauran, ken karinderia nga agdalan iti protokol ti DTI (Department of Trade and Industry);
– Establisimiento para iti pannakapasayaat ti bagi kas iti pagpapukisan, hair spa, hair salon, ken nail spa, kadagiti mangididiaya kadagiti pagpapintas ken pagparelaks, agraman ti pannakaidiaya dagitoy iti uneg ti pagtaengan, nga agdalan iti protokol ti DTI;
– Dagiti pagwatwatan nga agdalan iti protokol ti DTId; ken
– Pannakaparnuay dagiti pelikula, musika ken pabuya iti telebision, nga agdalan kadagiti pagalagadan nga impaulog ti DTI, DOLE (Department of Labor and Employment), ken ti DOH (Department of Health).
(Damag manipud iti Manila Bulletin.)
